საქართველოს პროკურატურის ინფორმაციით, ე.წ. კაბელების საქმის მასალების 90 პროცენტს გრიფით საიდუმლო არ ადევს და უწყებამ ის სასამართლო გადაწყვეტილების შემდეგ თავად გაასაჯაროვა. ამის შესახებ პროკურორმა საქმის მასალების გაცნობასთან დაკავშირებით პარლამენტის თავმჯდომარის მიერ გავრცელებული ინფორმაციის გაჟღერების შემდეგ განაცხადა.

საქართველოს პარლამენტის თავმჯდომარე ირაკლი კობახიძემ გუშინ, 5 თებერვალს TV პირველის ეთერში განაცხადა, რომ ე.წ. კაბელების საქმეზე "პასუხი არ უგია იმას, ვინც დანაშაული ჩაიდინა". მისი თქმით, ეს დასკვნა "საქმეში ჩახედვის" შემდეგ გამოიტანა.

ე.წ. კაბელების საქმე

კაბელების საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს.

თბილისის საქალაქო სასამართლომ ე.წ. კაბელების საქმეზე თავდაცვის სამინისტროს 5 ყოფილი მაღალჩინოსანი 2016 წლის 16 მაისს ბიუჯეტის თანხების გაფლანგვაში დამნაშავედ ცნო და სასჯელად თავისუფლების 7 წლით აღკვეთა მიუსაჯა.

ე.წ. კაბელების საქმეზე მსჯავრდებული, თავდაცვის სამინისტროს ყოფილი მაღალჩინოსნები პრეზიდენტმა გიორგი მარგველაშვილმა 2017 წელს შეიწყალა.