"არც ერთი ქალი არ შევშინდებით, გაავრცელეთ, რაც გინდათ", — ასე ეხმაურება იუსტიციის მინისტრი, თეა წულუკიანი უმრავლესობის წევრის, ეკა ბესელიას პირადი ცხოვრების ამსახველი კადრების გავრცელებას. 28 იანვარს სოციალურ ქსელებში პოლიტიკოსის პირადი ცხოვრების ამსახველი კადრების გავრცელების შესახებ ინფორმაცია დეპუტატმა, დავით ჭიჭინაძემ გაავრცელა.

"ყველანაირი ფარული ჩანაწერის გავრცელებას, მით უმეტეს როდესაც ეს ეხება და სავარაუდოდ, მიზნად ისახავს ქალზე ტერორს, ვგმობ", — ამბობს წულუკიანი.

მისი თქმით, არ არსებობს დედამიწაზე ქალი, რომელიც ფარ-ხმალს დაყრის, რადგან ქალი ძლიერია.

"მინდა, ყველამ იცოდეს, რომ არც ეკა ბესელია და არც სხვა ქალი არ არის ის ნატურა, რომელიც შეშინდება. ამიტომ ვინც ამას ავრცელებს, კარგი იქნება, თუ სხვა საქმით დაკავდება", — დასძენს მინისტრი.

ეკა ბესელიას ინფორმაციით, 27 იანვარს მიაწოდეს ინფორმაცია, რომ სოციალურ ქსელში პირადი და ოჯახური საიდუმლოების უკანონო ჩანაწერი ვრცელდება. პირადი ცხოვრების ამსახველი ვიდეოჩანაწერის შენახვისა და გავრცელების ბრალდებით 16 პირი დააკავეს.