ნიდერლანდებში, ქალაქ ჰააგის ერთ-ერთ ეკლესიაში 96 დღის განმავლობაში უწყვეტად მიმდინარე ღვთისმსახურება დასრულებულია. ამის შესახებ ინფორმაციას New York Times ავრცელებს. ტამრაზიანების ოჯახს, რომლის დასაცავადაც იმართებოდა ღვთისმსახურება, დაუყოვნებლივი დეპორტაციის საფრთხე აღარ ემუქრება. მათი საქმე თავიდან იქნება განხილული.

ტამრაზიანებს ოჯახს დეპორტაციის საფრთხე გასული წლის შემოდგომაზე შეექმნა. 26 ოქტომბრის შემდეგ ოჯახმა დეპორტაციისთვის თავის ასარიდებლად თავი ჰააგის ერთ-ერთ ეკლესიას შეაფარა. ვინაიდან, ადგილობრივი კანონმდებლობით არც პოლიციას და არც საემიგრაციო სამსახურს არა აქვს ღვთისმსახურების შეჩერების უფლება, სასულიერო პირები 26 ოქტომბრიდან დღემდე განუწყვეტლივ აღასრულებდნენ ღვთისმსახურებას.

ტამრაზიანების ოჯახის წარმომადგენელმა და პროცესის ორგანიზატორმა განაცხადა, რომ დღეს 31 იანვარს დილით, მას დაუკავშირდა საემიგრაციო სამსახური და მიიღო პირობა, რომ ოჯახის საქმე ხელახლა განიხილებოდა. ამის შემდეგ სასულიერო პირებმა ღვთისმსახურება შეაჩერეს.

სამი თვის განმავლობაში პროცესში ათასზე მეტმა სასულიერო პირმა მიიღო მონაწილეობა. ასევე, შეიქმნა პეტიცია ოჯახის დასახმარებლად, რომელსაც ხელი 250 ათასმა ადამიანმა მოაწერა ხელი. აღნიშნული ღვთისმსახურების პროცესი ისტორიაში შევა, როგორც ყველაზე ხანგრძლივი და უწყვეტი რელიგიური რიტუალი.