ეროვნულ-დემოკრატიული ინსტიტუტის (NDI) კვლევის მიხედვით, მოსახლეობის 36 პროცენტი, კითხვაზე, რომელი პარტია დგას მის შეხედულებებთან ახლოს, პასუხობს, რომ არც ერთი.

გამოკითხულთა 27 პროცენტი მის შეხედულებებთან ახლოს მდგომ პარტიად ქართულ ოცნებას ასახელებს. 12 პროცენტი — ნაციონალურ მოძრაობას, 3-3 პროცენტი ევროპულ საქართველოსა და პატრიოტათა ალიანსს. სხვა პარტიებს გამოკითხულთა 7 პროცენტი ასახელებს.

პარტიების მხარდაჭერის ეს მაჩვენებელი 2018 წლის ამავე მაჩვენებლის თითქმის იდენტურია. მხოლოდ ნაციონალური მოძრაობის რეიტინგია გაზრდილი 4 პუნქტით. ლეიბორისტულმა პარტიამ კი "სხვების" ჩამონათვალში გადაინაცვლა.

ამავე კვლევის მიხედვით, მოსახლეობის 44 პროცენტი ფიქრობს, რომ ქართული პოლიტიკური პარტიები ძირითადად საკუთარ ინტერესებს წარმოადგენენ, 31 პროცენტის აზრით კი მათი დამფინანსებლის/ლიდერის ინტერესებს. გამოკითხულთა მხოლოდ 13 პროცენტი ფიქრობს, რომ პოლიტიკური პარტიები მათნაირი ხალხის ინტერესებს წარმოაჩენს.

ხვალ რომ საპარლამენტო არჩევნები ტარდებოდეს მოსახლეობის 52 პროცენტს არ აქვს გადაწყვეტილი, თუ ვის მისცემდა ხმას. მომავალ საპარლამენტო არჩევნებში ქართულ ოცნებას 24 პროცენტი მისცემდა ხმას, ერთიან ნაციონალურ მოძრაობას — 11 პროცენტი, პატრიოტთა ალიანსს კი - 3 პროცენტი.

ეროვნულ დემოკრატიული ინსტიტუტის (NDI) კვლევის საველე სამუშაოები 2018 წლის 6-20 დეკემბერს ჩატარდა. კვლევის ფარგლებში 2 205 დასრულებული ინტერვიუ შედგა. საშუალო ცდომილების ზღვარი +/- 2,1 პროცენტი.