ეროვნულ-დემოკრატიული ინსტიტუტის (NDI) 2019 წლის კვლევის მიხედვით, მოსახლეობის უმრავლესობა ფიქრობს, რომ საქართველომ უნდა შეზღუდოს საქართველოში ჩამომსვლელი უცხოელი იმიგრანტების რაოდენობა. ამ მოსაზრებას არ ეთანხმება მოსახლეობის 37 პროცენტი.

ამავე კვლევის მიხედვით, მოსახლეობის 72 პროცენტი ეთანხმება მოსაზრებას, რომ სამსახურში აყვანისას დამსაქმებელმა უპირატესობა უცხოელთან შედარებით ქართველს უნდა მიანიჭოს, კანდიდატის კვალიფიკაციის მიუხედავად.

გამოკითხულთა 61 პროცენტი ასევე იზიარებს მოსაზრებას, რომ საქართველოში ეთნიკური მრავალფეროვნება მისი ძლიერი მხარეა და არა სუსტი.

რაც შეეხება მოსაზრებას, რომ უცხოელ იმიგრანტებს საქართველოს ეკონომიკაში მნივნელოვანი წვლილი შეაქვთ, გამოკითხულთა 46 პროცენტი ეთანხმება, 40 პროცენტი კი არა.

ფოტო: ირაკლი კუნჭულია / On.ge

ეროვნულ-დემოკრატიული ინსტიტუტის (NDI) კვლევის საველე სამუშაოები 2018 წლის 6-20 დეკემბერს ჩატარდა. კვლევის ფარგლებში 2 205 დასრულებული ინტერვიუ ჩატარდა. საშუალო ცდომილების ზღვარი +/- 2,1 პროცენტია.