ქიბარ ხალვაში ირაკლი ოქრუაშვილის განცხადებას იმასთან დაკავშირებით, რომ ხალვაშს რუსთავი 2-ის წილი არასდროს ეკუთვნოდა, Facebook-ის მეშვეობით ეხმაურება:

"მართალი ყოფილა ახალი საუკუნის ქართული ანდაზა: ყოფილი ნაცი არ არსებობს. ნაციონალი არის ყველა, ვინც ცხოვრობს წესით: ხელისუფლებისთვის და ფულის საშოვნელად ყველაფერი მოსულა. ამას წარსული დავიწყებია და აუცილებლად შევახსენებ. იმდენი არ ქნას, უსახლკაროდ დარჩეს. მაესტროს ამბები რომ წამოიწყეს, მგონი, 2012 იყო. იმის მერე ურთიერთობა არ მქონია, ვფიქრობდი, რომ მიშასთან შეთანხმებით მუშაობდა, მაგრამ მაინც ბოლომდე არ მჯერა. ახლა დავიჯერე. მაინც მეცოდება, გავაფრთხილებ: მიშასთან თამაში საშიშია".

4 სექტემბერს, თავდაცვის ყოფილმა მინისტრმა, ირაკლი ოქრუაშვილმა რუსთავი 2-თან საუბარში განმარტა, რომ ტელეკომპანიის წილი ქიბარ ხალვაშს არასდროს ეკუთვნოდა და მისი მფლობელი თავად იყო. აღნიშნულის გამო ის სამართლებრივი დავის დაწყებას აპირებს.

გუშინ რუსთავი 2-ის ჟურნალისტმა, ნოდარ მელაძემ P. S.-ში განაცხადა, რომ მას გადასცეს დოკუმენტი, რომელშიც ჩანს, რომ ტელეკომპანიის წილის მფლობელი ირაკლი ოქრუაშვილია და არა ქიბარ ხალვაში. მისი განმარტებით, 5-პუნქტიანი შეთანხმება 2010 წლის თებერვალშია გაფორმებული.