საქართველოს იუსტიციის უმაღლესი საბჭოს არამოსამართლე წევრი, ნაზი ჯანეზაშვილი აცხადებს, რომ ქვეყანას სასამართლო არ აქვს და რომ სისტემაში განსხვავებული აზრი არ არსებობს.

"ჩვენ ვნახეთ, რომ ეს იყო კომუნისტური პარტიის ყრილობა".

ნაზი ჯანეზაშვილი მიიჩნევს, რომ რიგი გამომსვლელი მოსამართლეები იქ მისი და ანა დოლიძის გასალანძღად მივიდნენ:

"279 მოსამართლე იმისთვის შეიკრიბა და იმისთვის ჩამოვიდნენ სხვადასხვა რეგიონიდან, რომ ჩვენ მიმართ დაეფიქსირებინათ ასეთი დაუსაბუთებელი, გაუმართლებელი, უსაფუძვლო განცხადებები".

კონფერენციაზე სიტყვით გამოსვლებს დამსწრე მოსამართლეები აპლოდისმენტებით ხვდებოდნენ. იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა ტრიბუნიდან განაცხადა, რომ კონფერენციაზე განსხვავებული აზრი არ გაჟღერებულა. ჯანეზაშვილის სიტყვით გამოსვლას დარბაზში ხმაური მოჰყვა. მოსამართლეთა ნაწილი ითხოვდა, მისთვის მიკროფონი გაეთიშათ.

კონფერენციის ბოლოს მოსამართლეებმა საერთო განცხადება გაავრცელეს, სადაც ბოლო პერიოდში მართლმსაჯულების სისტემაში განვითარებული მოვლენები შეაფასეს. მათ შორის, უზენაესი სასამართლოს მოსამართლეების არჩევის საკითხი.

მოსამართლეები აცხადებენ, რომ უნდა შეწყდეს ზეწოლა სასამართლო ხელისუფლებაზე და მიეცეს მას შესაძლებლობა მშვიდ გარემოში განაგრძოს საქმიანობა.