საქართველოს პრემიერ-მინისტრი, მამუკა ბახტაძე აცხადებს, რომ თიბისი ბანკთან დაკავშირებით "პოლიტიკური სპეკულაციის თემა უფრო დაინახა, ვიდრე არგუმენტირებული პასუხი".

პრემიერის თქმით, ყველა გამოძიების დასრულებას უნდა დაელოდოს, რათა კითხვებს პასუხი გაეცეს.

"საერთაშორისო ფინანსური ინსტიტუტები აღნიშნავენ, რომ ჩვენი ფინანსური სექტორი არის განსაკუთრებით მდგრადი რეგიონში და ამავე დროს, ეს არის ძალიან მნიშვნელოვანი მონაპოვარი. მე ძალიან შორს ვარ იმ მოსაზრებისგან, რომ თუ კითხვები გაჩნდა რომელიმე ინდივიდუალური აქციონერის მიმართ, ეს გამოიწვევს ამ ძალიან დიდი მონაპოვარის გარკვეულ შესუსტებას. სამწუხაროდ, აქ მე უფრო დავინახე პოლიტიკური სპეკულაციის თემა, ვიდრე არგუმენტირებული პასუხი. თუ კითხვები არსებობს, რაც ეხება ინდივიდუალურ აქციონერს, ამ კითხვებზე პასუხის გაცემა არ მიმაჩნია მე პირადად პრობლემად“, - განაცხადა მამუკა ბახტაძემ.

მისი თქმით, რეალობასაა მოწყვეტილი, რომ კითხვების დასმა საქართველოს ფინანსურ სტაბილურობაზე უარყოფითად იმოქმედებს, რადგან მოწყვეტილია რეალობას.

"ჩვენთვის ძალიან დიდი მონაპოვარია, რომ ჩვენი კომპანიები წარმოდგენილი არიან ლონდონის ბირჟაზე. დიდი მადლობა ყველას, ვინც ამაში მონაწილეობს, ვინაიდან ამან გზა გაუხსნა სხვა ქართულ კომპანიებს, რომ წვდომა ჰქონდეთ საერთაშორისო კაპიტალზე, ჩვენი ფინანსური სტაბილურობა არის ძალიან მაღალი და ამას ადასტურებს ყველა საერთაშორისო ფინანსური ინსტიტუტი. მე ვფიქრობ, რომ ამ თემაზე საუბარი, რომ ფინანსურ სტაბილურობას შეიძლება რამე საფრთხე შეექმნას, არ შეესაბამება რეალობას. დაველოდოთ გამოძიებას, დაველოდოთ შეკითხვებს, დაველოდოთ პასუხებს, ყველა მივიღებთ პასუხებს", — განაცხადა მამუკა ბახტაძემ.

2018 წლის 2 აგვისტოს დაიწყო გამოძიება უკანონო შემოსავლების საქმეზე გამოძიება სისხლის სამართლის კოდექსის 194 მუხლის მესამე ნაწილით. ამ მუხლით დიდი ოდენობით უკანონო შემოსავლების ლეგალიზაციის მუხლით მიმდინარეობს, რაც 9-დან 12 წლამდე პატიმრობას ითვალისწინებს.

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. თიბისი ბანკმა დოკუმენტების ამოღებასთან დაკავშირებით პროკურატურას 9 იანვარს უპასუხა და გავრცელებული ინფორმაციას "მიზანმიმართული დისკრედიტაციისა და რეპუტაციის შელახვის მცდელობას" უწოდებს.