თბილისში, კოსტავას ქუჩაზე მომხდარ სროლაში მონაწილე ერთ-ერთი პირი გია კორკოტაშვილის შვილი, ვაჟა კორკოტაშვილია. ამის შესახებ ინფორმაცია ტელეკომპანია რუსთავი 2-მა წყაროზე დაყრდნობით გაავრცელა.

"ისეთი ცხოვრება მაქვს მე დაძაბული და ის, რომ ეგეთი ჩხუბი რომ მოსვლოდა, ვაჟიკო ეგეთ რამეზე საქმის კურსში არ მაყენებს, თავის პიროვნული ბიჭობაც ყოფნის და ყველაფერიც, რომ საჩხუბარი თუა, იჩხუბოს, მოსაფერებელი თუა, მოეფეროს", — უთხრა გია კორკოტაშვილმა რუსთავი 2-ს შვილთან დაკავშირებით დასმულ კითხვაზე საუბრისას.

სროლა ვერაზე გუშინ, 15 იანვარს, დაახლოებით 17 საათზე იყო. რადიო თავისუფლება, რომლის ოფისიც იქვე მდებარეობს, წერს, რომ მელიქიშვილის გამზირზე უმძღოლო ნატყვიარი ავტომობილი დაგორდა და მოპიდაპირე მხარეს მანქანას შეეჯახა. მათი ინფორმაციით, ავტომობილს საბარგულზე და ასევე საქარე მინაზე აღენიშნება სავარაუდოდ სამ-სამი ნატყვიარი და ჩამსხვრეულია უკანა შუშა.