პროკურატურამ დაზარალებულად სცნო აქტივისტი გიგა მაქარაშვილი, რომელსაც გორის მერიის ადმინისტრაციის უფროსმა, თეიმურაზ მანველიშვილმა თავზე ნაგვიანი ვედრო დაამხო. უწყების განმარტებით, ამ ქმედებით ჩინოვნიკმა აქტივისტი დაამცირა და პატივისა და ღირსების შემლახავ მდგომარეობაში ჩააყენა, რამაც მას ძლიერი ფსიქიკური ტკივილი და მორალური ტანჯვა მიაყენა.

პროკურატურამ მაქარშვილი დაზარალებულად არ სცნო ოქტომბერში. მაშინ უწყებაში ამბობდნენ, რომ აქტივისტმა და მისმა ადვოკატმა ითხოვეს, რომ საქმეზე კვალიფიკაცია შეცვლილიყო 144-ე მუხლის მე-3 პრიმა მუხლით, რომელიც მოიცავს პირის დამცირებას, ან იძულებას, არაადამიანურ, პატივისა და ღირსების შემლახავ მდგომარეობაში ჩაყენებას, რაც მას ძლიერ ფიზიკურ, ფსიქიკურ ტკივილს ან მორალურ ტანჯვას აყენებს.

უწყება მაშინ განმარტავდა, რომ შეესაბამებოდა თუ არა მაქარაშვილის მდგომარეობა მისი დაზარალებულად ცნობის მოთხოვნას, ფსიქოლოგიური ექსპერტიზით უნდა დადგენილიყო.

2018 წლის 10 ოქტომბერს მოძრაობა რუსეთი ოკუპანტიას აქტივისტები გორის მუნიციპალიტეტის მერიის ადმინისტრაციული შენობის წინ საპროტესტო აქციას ატარებდნენ. მათ, გორის მუნიციპალიტეტის მერიის ადმინისტრაციული შენობის წინ პურის მარცვალი და ნაკელი დაყარეს.

აქციის დასრულების შემდეგ, აქტივისტები კიბეებს ასუფთავებდნენ, რა დროსაც მერიის ადმინისტრაციული და შესყიდვების სამსახურის უფროსმა თეიმურაზ მანველიშვილმა აქტივისტ გიორგი მაქარაშვილს ნაგვით სავსე ურნა თავზე დაამხო. საქმეზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

გორის მერმა კონსტანტინე თავზარაშვილმა ადმინისტრაციის უფროსს მხოლოდ საყვედური გამოუცხადა. როგორც მერიის პრესსამსახურის თანამშრომელმა On.ge-სთან საუბრისას თქვა, აღნიშნული გადაწყვეტილება მერმა იურიდიულ სამსახურთან კონსულტაციების შემდეგ მიიღო.