ჭყონდიდის მიტროპოლიტი პეტრე ცაავა რიგით მესამე მღვდელმთავარია, რომელიც უკრაინის ეკლესიის ავტოკეფალიის საკითხს საპატრიარქოს მიღმა აფასებს. მისი თქმით, სიფრთხილე საჭიროა, მაგრამ არანაირი წონადობა იმ არგუმენტებს არ აქვს, რომ არ მიულოცონ და გაიზიარონ უკრაინის სიხარული. ამის შესახებ პეტრე ცაავამ ტვ პირველის ეთერში ლევან ჩხეიძესთან ინტერვიუში ისაუბრა:

"[ავტოკეფალია] როგორი ბედნიერება იყო ჩვენთვის... მაშინ რუსეთის ეკლესიას უნდა მიემსგავო, რომელიც ყაენის მდგომარეობაშია, ძმამ რომ შურით ძმა მოკლა".

პეტრე ცაავა ამბობს, რომ ზოგიერთ მღვდელმთავარს საპატრიარქოში მართლა მიაჩნია, რომ მეტი სიფრთხილეა საჭირო, ზოგს კი მიაჩნია, რომ აფხაზეთში მართლა შეიქმნება პრობლემები:

"მთავარია, საბოლოო ჯამში სიმართლე იზეიმებს და ჩვენ უსამართლობის მხარეს ვერ დავდგებით. ეს არის გარდაუვალი და ეს არის სამართლიანობა, რომ უკრაინას აქვს უკრაინის უწმინდესი ეკლესია".

არც საპატრიარქოს და არც ხელისუფლებას უკრაინის ეკლესიისთვის ავტოკეფალიის მინიჭება ოფიციალურად არ მიულოცავს. გუშინ 13 იანვარს საკვირაო ქადაგებისას ფოთისა და ხობის მიტროპოლიტმა, მეუფე გრიგოლმა განაცხადა, რომ ხელისუფლების მიერ უკრაინისთვის ეკლესიის ავტოკეფალიის მილოცვისგან თავის შეკავება გულდასაწყვეტია. მიტროპოლიტი მიიჩნევს, რომ უკრაინისთვის ეროვნული ეკლესიის არსებობას რელიგიურთან ერთად სახელმწიფო მნიშვნელობა აქვს.

მანამდე, შემოქმედელმა მიტროპოლიტმა იოსებმა უკრაინის ეკლესიისთვის მისალოცი წერილი საკუთარი ეპარქიის გვერდზე გამოაქვეყნა. მისი თქმით, უკრაინა ღირსია ავტოკეფალური ეკლესია ჰქონდეს, "რამეთუ იგი საუკუნეებია იბრძოდა მიეღო დამოუკიდებლობა".

უკრაინის ეკლესიის ავტოკეფალიის საკითხზე რამდენიმე დღის წინ პოზიცია საჯაროდ დააფიქსირა დეკანოზმა ილია ჭიღლაძემაც: "ვინც არ ულოცავს უკრაინელ ერს ამ გამარჯვებას, ის ან რუსულ იმპერიალიზმს ეტრფის და ემსახურება, ან შეშინებული კონფორმისტია".

ახალქალაქისა და კუმურდოს მიტროპოლიტის განცხადებით, საპატრიარქო ავტოკეფალიის მინიჭების ტომოსს (ბრძანებას) მომდევნო სინოდის სხდომაზე შეისწავლის და შემდეგ ექნება ოფიციალური პოზიცია.

"ტომოსი ხომ უნდა წავიკითხოთ, იქნებ რა წერია ამ ტომოსში, როგორ შეიძლება რომ გამოვხატოთ ოფიციალურად", — განაცხადა მიტროპოლიტმა ნიკოლოზმა.

6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა. ამით, ოფიციალურად გამოეყო უკრაინის ეკლესია რუსეთის ეკლესიას და ფორმალურად გაფორმდა ოქტომბერში მიღწეული შეთანხმება, ავტოკეფალიის მინიჭებაზე.

წინა დღეს, 5 იანვარს მსოფლიო პატრიარქმა ბართლომემ ტომოსს ხელი მოაწერა. ტომოსის გადაცემის ცერემონიას დაესწრნენ უკრაინის მთავრობის წევრები, უმაღლესი რადას სპიკერი და პრეზიდენტი პეტრო პოროშენკო.