პოლონეთის ქალაქ გდანსკის მერს, პაველ ადამოვიჩს საქველმოქმედო კონცერტის დროს თავს ცივი იარაღით დაესხნენ და დაჭრეს. როგორც BBC წერს, 13 იანვარს თავდამსხმელი სცენიდან ყვიროდა, რომ ციხეში უსამართლოდ გაასამართლეს და ციხეში აწამებდნენ. ადგილიდან გავრცელებული ვიდეოებიდან ჩანს, რომ თავდასხმის შემდეგ კაცი სცენაზე დადიოდა და ყვიროდა "ადამოვიჩი მოკვდა".

პაველ ადამოვიჩს დანით რამდენჯერმე დაჭრეს. მას ხუთსაათიანი ოპერაცია ჩაუტარეს და ქირურგის თქმით, მერის მდგომარეობა კრიტიკულია. ექიმები აღნიშნავენ, რომ 53 წლის ადამოვიჩს ჭრილობა მიაყენეს გულის არეში და დაზიანებული აქვს შინაგანი ორგანოები.

პოლიციამ 27 წლის თავდამსხმელი უკვე დააკავა. სამართალდამცავები იძიებენ, თუ როგორ მოახერხა კაცმა კონცერტის დროს მერთან ასე ახლოს მისვლა.