ადამიანის უფლებათა ევროპული სასამართლოს გადაწყვეტილებით, აზერბაიჯანს გამომძიებელი ჟურნალისტის, ხადიჯა ისმაილოვასთვის თითქმის 17 000 ევროს გადახდა დაეკისრა, რაც ჟურნალისტის წინააღმდეგ წარმოებულ შანტაჟის კამპანიას უკავშირდება.

სასამართლოს 10 იანვრის გადაწყვეტილების მიხედვით, გონივრული ეჭვის საფუძველზე დადგინდა, რომ ისმაილოვას პირად ცხოვრებაში შეჭრაზე პასუხისმგებლობა თავად სახელმწიფოს აკისრია. ადამიანის უფლებათა ევროპულ სასამართლოში აცხადებენ, რომ აზერბაიჯანმა უარი თქვა, გამოეძიებინა ჟურნალისტის წინააღმდეგ წარმოებული შანტაჟის კამპანია, დაეცვა ისმაილოვას ღირსება და გამოხატვის თავისუფლება.

აზერბაიჯანს დაეკისრა პასუხისმგებლობა, რომ გადაუხადოს 15 ათასი ევრო ჟურნალისტს მიყენებული ტკივილისა და ტანჯვისთვის, და დაფაროს სასამართლოს ხარჯებიდან 1750 ევრო.

რადიო თავისუფლების ყოფილი ჟურნალისტი, ხადიჯა ისმაილობა 2012 წელს აზერბაიჯანის პრეზიდენტის ილჰამ ალიევისა და აზერბაიჯანის ელიტის კორუფციული საქმიანობას იძიებდა, როცა შანტაჟის წერილი მიიღო, სადაც ეწერა, რომ საჯაროდ დაამცირებდნენ.

წერილი შეიცავდა ფოტოებს სექსუალური შინაარსის ვიდეოდან, რომელიც ფარულად იყო გადაღებული ისმაილოვას ბინაში. ვიდეო ინტერნეტში მას შემდეგ გავრცელდა, რაც ისმაილოვამ უარი თქვა გამოძიების შეწყვეტაზე. მან საჯაროდ განაცხადა, რომ მის წინააღმდეგ შანტაჟის კამპანია მიმდინარეობდა.

ისმალიოვამ მოგვიანებით თავის ბინაში იპოვა ფარული კამერა და სპეციალური აღჭურვილობა, რომელიც გადაღებულ კადრებს ბინის გარეთ ავრცელებდა. როცა ისმაილოვა ბაქოს სამართალდამცავი სტრუქტურების არაეფექტურობაზე ალაპარაკდა, მთავრობამ პასუხად გამოძიების ხელთარსებული ინფორმაცია გამოაქვეყნა. მოკვლევა შეიცავდა დეტალებს მისი პირადი ცხოვრებიდან, მათ შორის მისი მეგობრების ვინაობას, ოჯახის წევრების მისამართებს...

ხადიჯა ისმაილოვა 2014 წელს გადასახადებისთვის თავის არიდების და არალეგალური მეწარმეობის ბრალდებით დააკავეს და ექვსი წელი და ექვსი თვე მიუსაჯეს. ისმაილოვა ბრალდებებს უარყოფდა და ამბობდა, რომ მისი საქმიანობის გამო დააპატიმრეს.

2016 წელს აზერბაიჯანის უზენაესმა სასამართლომ ჟურნალისტის გათავისუფლების გადაწყვეტილება მიიღო, თუმცა ხუთწლიანი გამოსაცდელი ვადა მისცა. მოგვიანებით სასჯელი 2 წლამდე და სამ თვემდე შემცირდა. საპატიმროდან გათავისუფლების მიუხედავად, ისმაილოვას ქვეყნიდან გასვლის უფლება არ აქვს.