ბიძინა ივანიშვილი სასამართლოს ქართული ოცნების ყველაზე დიდ მონაპოვრად აფასებს. მისი თქმით, სასამართლოს კონტროლი მის პირად ინტერესებში არ შედის. ივანიშვილის შეფასებით, სასამართლო სისტემა იდეალური არ არის და სჭირდება შემდგომი განვითარება. ამის შესახებ ყოფილმა პრემიერმინისტრმა ტელეკომპანია GDS-ის წინასაარჩევნო პროექტში - შეხვედრები რეგიონალურ მედიასთან განაცხადა:

"ძალიან ცუდია, რომ მოსამართლეები საჯარო სივრცეებში ახერხებენ ერთმანეთს უპასუხონ. ამავდროულად, თუ ანალიზის უნარი ვინმეს აქვს და უყურებს ამას, იქ ძალიან კარგად შეიძლება გაიგო რა ხდება რეალურად. თუმცა მე თავს შევიკავებდი ანალიზისგან, რამეთუ სასამართლოა და მე ყველაზე დიდ სირთულედ და ყველაზე დიდ მონაპოვრადაც რაც მოვედით, რომ სასამართლოს ძალა მიეცა. რის საფუძველზე და რისთვის ვაკონტროლებ მოსამართლეს და რა მაქვს პირადი და რაში გამოვიყენე სასამართლო? რატომ მჭირდება მე სასამართლოს კონტროლი? გარდა ზოგადისა, მე არავითარი პირადული ინტერესი არ მაქვს, რომ ავაშენოთ დემოკრატიული ქვეყანა და აქ სასამართლოს ლომის წვლილი აქვს. თუ საზოგადოებამ სამართლიანობა ვერ იგრძნო და სასამართლოს დამოუკიდებლობას ვერ მივაღწიეთ - ტყულია, ყველაფერი წყალში ჩაიყრება. იდეალურია სასამართლო დღეს? - ვერ იქნება იდეალური. მაგრამ ნახეთ საერთაშორისო ორგანიზაციების შეფასება, რა იყო და რა არის დღეს. რა თქმა უნდა, ამას სჭირდება შემდგომი განვითარება. თვითონ ვერ აკონტროლებენ სასამართლოს და ამაზე არიან აღშფოთებულნი და მომაწერენ მე."

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.