საქართველოს ყოფილმა პრემიერმინისტრმა, ბიძინა ივანიშვილმა GDS-ის პირდაპირ ეთერში, აჭარის რეგიონულ მედიასთან შეხვედრისას თბილისის მერს, დავით ნარმანიას, კომუნიკაცია დაუწუნა:

"დედაქალაქის მერის საქმიანობა რომ შევაფასოთ, უნდა ვნახოთ რა გაკეთდა ქალაქში, ნარმანიასთან დაკავშირებით რაც დასაწყისში და მერე მოხდა, ჩანდა, რომ ნარმანიას საზოგადოებასთან კომუნიკაციის პრობლემა გაუჩნდა და გამოჩნდა, პრინციპში. სხვა დანარჩენი, უნდა ვნახოთ რა გაკეთდა ქალაქში, რა იყო, როგორი ქალაქი ჩაიბარა და რა ხდება. იქაც იგივე საუბრობენ, როგორც აჭარაზე, რომ გაჩერდა ყველაფერი. ამ დროს, თუ ციფრებს შევხედავთ, ყველაფერი პირიქითაა. მშენებლობა გინდათ, გზები გინდათ, ყველაფერი მეტი შენდება და კეთდება, ვიდრე ნაციონალური მოძრაობის დროს. მე არ მომეწონა ბოლოს როგორ კონტექსტშიც მიმართა, საერთოდ, შეიძლება ცოტა პრობლემა არის ამ მხრივ, მაგრამ ჩემთვის ძირითადი არის სტანდარტები: ხელისუფლება სათავისოდ არ გამოიყენოს, კანონი დაიცვას, გამჭვირვალე იყოს მმართველობა - ამ მხრივ პრობლემები არ არის. მენეჯმენტი როგორია და როგორი უნდა იყოს, ამაზე შეიძლება პაექრობა".

"შეხვედრები რეგიონულ მედიასთან", - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერ-მინისტრი ბიძინა ივანიშვილი მონაწილეობს.

გადაცემას 2030-ის ჟურნალისტები ნათია თოიძე და მიხეილ ფეიქრიშვილი უძღვებიან. პროექტის პირველი გადაცემა 1 სექტემბერს, 12:00 საათზე აჭარიდან გავიდა GDS-ის პირდაპირ ეთერში.