ზემო თელეთში შვილმა ხანდაზმული დედა ცივი იარაღით დაჭრა. ექიმების ცნობით, პაციენტს დაზიანებული აქვს ფილტვი და ღვიძლი. მას ოპერაცია უკვე ჩაუტარდა და მისი მდგომარეობა პოსტოპერაციულ პერიოდს შეესაბამება.

"პაციენტს ჭრილობა გულ-მკერდის არეში აქვს. ჩაუტარდა სასწრაფო ოპერაცია. დაზიანებული იყო ფილტვი, დიაფრაგმა, ღვიძლი. დაზიანებული სტრუქტურების მთლიანობა აღდგა. პაციენტი ამჟამად იმყოფება პოსტოპერაციული მეთვალყურეობის ქვეშ რეანიმაციულ განყოფილებაში. მდგომარეობა სტაბილურია, შეესაბამება პოსტოპერაციულ პერიოდს", — განაცხადა რუსთავი 2-თან საუბრისას ექიმმა, მარინე ლიჩელმა.

საქმეზე გამოძიება ოჯახური ძალადობის ნიადაგზე ჯანმრთელობის განზრახ მძიმე დაზიანების მუხლით მიმდინარეობს. ბრალდებული უკვე დაკავებულია და მას 3-დან 6 წლამდე პატიმრობა ემუქრება.