საუდის არაბეთში ქალები განქორწინების შესახებ ინფორმაციას მობილურზე ტექსტური შეტყობინებით მიიღებენ. BBC-ის ინფორმაციით, 5 იანვარს საუდის არაბეთში ძალაში შევიდა დადგენილება, რომლითაც დასრულდება ე.წ. საიდუმლო განქორწინებები, როდესაც ქმარი ცოლს ქორწინების დასრულების შესახებ არ ატყობინებდა.

მთავრობამ სასამართლო დაავალდებულა, განქორწინების შემთხვევაში ქალებს ტექსტური შეტყობინება მობილურზე გაუგზავნო. უფლებადამცველები აღნიშნავენ, რომ ახალი რეგულაციის დახმარებით ქალებს თავისი უფლებების დაცვა უკეთ შეეძლებათ.

"ბევრი ქალი მიმართავდა სააპელაციო სასამართლოს, რადგან ქმრები განქორწინების შესახებ უბრალოდ არ ეუბნებოდნენ", — ამბობს ერთ-ერთი ადვოკატი.

ახალი რეგულაცია იმ მასშტაბური ეკონომიკური და სოციალური რეფორმის ნაწილია, რომელსაც საუდის არაბეთის პრინცმა მუჰამედ ბინ სალმანმა ჩაუყარა საფუძველი. ბოლო თვეების განმავლობაში საუდელ ქალებს უფლება მისცეს მართონ ავტომობილი, დაესწრონ ფეხბურთის მატჩებს და იმუშაონ ისეთ სპეციალობებზე, რომელიც აქამდე მხოლოდ კაცებისთვის იყო ხელმისაწვდომი.

მიუხედავად ამისა, საუდის არაბეთში ქალები კაცი-მეურვის თანხმობის გარეშე ბევრ რამეს ვერ აკეთებენ. მაგალითად, ისინი დამოუკიდებლად ვერ იღებენ პასპორტს, ვერ თხოვდებიან, ვერ ხსნიან საბანკო ანგარიშებს, ვერ იკეთებენ გეგმიურ ოპერაციებს და ა.შ.