რუსეთის ქალაქს მაგნიტოგორსკში, სადაც საცხოვრებელი კორპუსი ჩამოინგრა, ინციდენტიდან მეორე დღეს ათი თვის ბავშვი ცოცხალი იპოვეს. ბავშვი ძლიერ ყინვაში ნანგრევების ქვეშ ერთ დღეზე მეტხანს იყო.

"ჩვილი გადარჩა, რადგან საწოლში თბილად გახვეული იყო", — განაცხადა ჩელიაბინსკის ოლქის გუბერნატორმა.

როგორც BBC-ის რუსული სამსახური წერს, ბავშვს ფეხზე აქვს მოტეხილობა და ქალა-ტვინის დაზიანება აღენიშნება. მას სამკურნალოდ მოსკოვში გადაიყვანენ.

მაგნიტოგორსკში გაზის აფეთქების შედეგად ათსართულიანი საცხოვრებელი კორპუსის სადარბაზო 31 დეკემბერს ჩამოიშალა. ამ დროისთვის ნაპოვნია რვა ადამიანის გვამი, ექვსი ადამიანი საავადმყოფოში გადაიყვანეს, ხოლო 36-ის ბედი ამ დრომდე უცნობია.

შენობის ნაწილის ჩამონგრევის საშიშროების გამო სამაშველო ოპერაცია ერთი დღით შეჩერდა. 2 იანვარი ჩელიაბინსკის ოლქში გლოვის დღედ გამოცხადდა.