"მე ვარ, ლევან მურუსიძე, ამ სასამართლოს ლიდერი, რომელიც აერთიანებს მოსამართლეებს რეალურად იმ თემებზე საბრძოლველად, რასაც ჰქვია სასამართლოს რეალური დამოუკიდებლობა", — ამის შესახებ თბილისის სააპელაციო სასამართლოს მოსამართლე ლევან მურუსიძემ იუსტიციის უმაღლესი საბჭოს სხდომაზე განაცხადა. სხდომაზე მისი მოსამართლედ უვადოდ გამწესების საკითხს განიხილავენ.

სხდომის დაწყების წინ მურუსიძემ განაცხადა, რომ მასზე მას შემდეგ დაიწყეს, რაც სასამართლოს ლიდერად ჩამოყალიბდა. საბჭოს არამოსამართლე წევრმა, ნაზი ჯანეზაშვილმა მურუსიძე სასამართლო სისტემაში ე.წ. ჩინჩალაძის კლანზე ჰკითხა. მურუსიძის თქმით, სასამართლო სისტემაში "არანაირი კლანი არ არსებობს":

"დიდი პასუხისმგებლობით ვაცხადებ, რომ ამ სასამართლოში მე ვარ ლიდერი, რომელსაც მოსამართლეებთან აქვს ურთიერთობა დიდი ხნის განმავლობაში და ეს ურთიერთობა აგებულია მეგობრობაზე, ურთიერთპატივისცემაზე... სასამართლო სისტემაში არ არსებობს არანაირი კლანი და სასამართლო სისტემა მიდის დამოუკიდებლობისაკენ. დიდი ნაბიჯია გადადგმული დამოუკიდებლობისაკენ".

ლევან მურუსიძე არაერთ გახმაურებულ საქმესთან არის დაკავშირებული, როგორც წინა ხელისუფლების დროს, ისე ახლა. ნაციონალური მოძრაობის მმართველობის დროს მან განიხილა სანდრო გირგვლიანის მკვლელობის საქმე. მისი გადაწყვეტილებით გირგვლიანის მკვლელობაში ბრალდებულებს სასჯელები შეუმცირდათ. მოქმედი ხელისუფლების დროს კი მურუსიძემ განიხილა აიისას საქმე.

დღეს, 27 დეკემბერს უმაღლესი საბჭოს სხდომაზე შესვლის წინ მურუსიძემ განაცხადა, რომ სურს გირგვლიანის საქმეზე ყველა კითხვას უპასუხოს როგორც უმაღლეს საბჭოსთან, ასევე ნებისმიერი ტელევიზიის პირდაპირ ეთერში. მისი თქმით, ორი წლის განმავლობაში პოლიტიკური პარტიები გირგვლიანის საქმეზე მას აწმენდნენ ხელს.

მურუსიძემ აღნიშნა ისიც, რომ მზად არის სისხლის სამართლის პროცესის მცოდნე ნებისმიერ ადამიანთან განიხილოს გირგვლიანის საქმე. მისი მტკიცებით, იმ პირობებში, რაშიც თვითონ მოუწია მუშაობა სხვა დასკვნას ვერავინ გამოიტანდა.

მურუსიძე 3-წლიანი გამოსაცდელი ვადით სააპელაციო სასამართლოს მოსამართლედ 2015 წლის დეკემბერში აირჩიეს. მის სახელს უკავშირდება ხმაურიანი განცხადებებიც. 2017 წელს, იუსტიციის საბჭოს მდივნის პოზიციაზე ყოფნის დროს ის აცხადებდა, რომ სასამართლოს პრესტიჟის გადასარჩენად საჭიროა მედიის ცენზურა. სწორედ ამ მოტივით ახსნა მან საბჭოს მიერ 25-გვერდიანი განცხადების გავრცელება. განცხადებაში საბჭო ღიად საუბრობდა იმ ჟურნალისტებისთვის სანქციების დაწესებაზე, რომლებიც მოსამართლეებს აკრიტიკებენ, მათი აზრით, შეურაცხმყოფელი ტერმინებით.