წავკისში მომხდარი ინციდენტის დროს 2 ადამიანის მკვლელობის, 2-ის დაჭრისა და დანაშაულის შეუტყობინებლობის ბრალდებით 3 პირი დააკავეს. შინაგან საქმეთა სამინისტროს კრიმინალური პოლიციის მთავარი სამმართველოს უფროსის მამუკა ჭელიძის განცხადებით, დაკავებულები დანაშაულს აღიარებენ.

შინაგან საქმეთა სამინისტროს განცხადებით, დანაშაულის ჩადენის მოტივი მანქანის დაზიანების გამო წარმოშობილი კონფლიქტი გახდა. მათ თქმით, 22 დეკემბერს, წავკისი-ტაბახმელას საავტომობილო გზაზე ავტოსაგზაო შემთხვევა მოხდა, რის შესახებაც საპატრულო პოლიციას არ აცნობეს. მხარეებმა ავტომობილისთვის მიყენებული ზიანის ასანაზღაურებლად მეორე დღეს შეხვედრა დაგეგმეს.

უწყების ინფორმაციით, შეხვედრა საღამოს, დაახლოებით, 20:00 სთ-ზე შედგა. მათივე თქმით, მხარეებს შორის საუბარი ჯერ სიტყვიერ შეურაცხყოფაში, შემდეგ კი ფიზიკურ დაპირისპირებაში გადაიზარდა, რასაც 2 ადამიანის სიცოცხლე ემსხვერპლა.

უწყების ინფორმაციით, დანაშაულის ჩადენის იარაღი შემთხვევის ადგილიდან ნივთმტკიცებად ამოიღეს. მათი თქმით, დაკავებულია 27 წლის კაცი, რომელსაც დამამძიმებელ გარემოებაში 2 ან მეტი პირის განზრახ მკვლელობა ედება ბრალად. მეორე დაკავებული კი 46 წლისაა და მას ჯგუფურად ჩადენილ განზრახ მკვლელობას ედავებიან.

მესამე 25 წლის პირი დანაშაულის შეუტყობინებლობის ბრალდებით დააკავეს. უწყებაში ამბობენ, რომ ის სარფის საბაჟო პუნქტზე ქვეყნის დატოვების მცდელობის დროს დააკავეს მკვლელობაში ბრალდებულ პირთან ერთად.

ინციდენტი შინდისში 23 დეკემბერს მოხდა. შემთხვევეის შედეგად დაჭრილები ამ დრომდე სამკურნალო დაწესებულებაში რჩებიან.