პრეზიდენტისა და არასამთავრობო სექტორის შეხვედრა ცესკოს თავმჯდომარის კანდიდატების შესარჩევად დასრულდა. შეხვედრაზე არასამთავრობო სექტორმა 4 კანდიდატი დაასახელა, თავად პრეზიდენტს საკუთარი კანდიდატი არ წარუდგენია.

სამოქალაქო საზოგადოებისა და დემოკრატიის განვითარების ცენტრის ხელმძღვანელის, ლადო ბოჟაძის განცხადებით, კანდიდატები არიან:

  • თამარ ჟვანია — ცესკოს მოქმედი თავმჯდომარე;
  • გოგი ჯავახიშვილი — ცესკოს მდივანი;
  • ლადო ბოჟაძე — სამოქალაქო საზოგადოებისა და დემოკრატიის განვითარების ცენტრის ხელმძღვანელი;
  • მარიამ შელეგია.

ბოჟაძის ინფორმაციით, გოგი ჯავახიშვილს კანდიდატურის წარდგენის მიუხედავად ცესკოს თავმჯდომარეობა არ სურს და ის პროცესში არ ერთვება.

როგორც შეხვედრის შემდეგ პრეზიდენტის ადმინისტრაციის უფროსმა, ლაშა ჟვანიამ განაცხადა, ხვალ, 21 დეკემბერს 12 საათამდე სალომე ზურაბიშვილმა უნდა მიიღოს შეთავაზებული კანდიდატების სია და მათი ბიოგრაფიები. მისივე თქმით, დღის ბოლოს პრეზიდენტი მიიღებს გადაწყვეტილებას რომელი სამი კანდიდატი წარადგინოს.

ცენტრალური საარჩევნო კომისიის მოქმედმა თავმჯდომარემ, თამარ ჟვანიამ ბოლო ოთხ თვეში, წინასაარჩევნო პერიოდში, 80 750 ლარი გამოიმუშავა. ამის შესახებ ინფორმაცია On.ge-მ ცესკოდან საჯარო ინფორმაციის სახით მიიღო.