საქართველოს კათოლიკოს პატრიარქი ილია მეორე ხორავას ქუჩაზე მოკლულის მამას, ზაზა სარალიძესა და მის ოჯახს საპატრიარქოში ხვდება. მან სიონში სადღესასწაულო წირვის დასრულების შემდეგ ზაზა სარალიძე და მისი მეუღლე რეზიდენციაში თავად წაიყვანა, იქამდე კი ქადაგებისას მიმართა.

"დღეს განსაკუთრებული დღეა, ჩვენთან წირვაზე ბრძანდებოდა ბატონი ზაზა, რომელმაც დაკარგა თავისი საყვარელი შვილი. წმინდა ნიკოლოზი შეეწია მას, პირველად ეზიარა დღეს ბატონი ზაზა, მე ვფიქრობ, შვილის ლოცვით. შვილი ლოცულობს მისთვის, დედისთვის, ოჯახისთვის", — განაცხადა პატრიარქმა.

ხორავას ქუჩის საქმის განხილვა სააპელაციო სასამართლომ უკვე დაიწყო. გუშინ, 18 დეკემბერს სარალიძე შინაგან საქმეთა სამინისტროში კრიმინალური დეპარტამენტის უფროსს, ვლადიმერ ბორცვაძეს შეხვდა. ზაზა სარალიძის განცხადებით, შინაგან საქმეთა სამინისტროში კონკრეტული პირების პასუხისმგებლობის საკითხი დღის წესრიგში დგას.