ხორავას ქუჩაზე მოკლული არასრულწლოვნის მამა, ზაზა სარალიძე აცხადებს, რომ ხვალ, 3 დეკემბრიდან აქტიურ ბრძოლას იწყებს. სარალიძე აპირებს პროკურორთან და შინაგან საქმეთა მინისტრთან შეხვედრას და საქმის მიმდინარეობაზე ინფორმაციის გამოთხოვას. ამის შესახებ მან რადიო თავისუფლებასთან ისაუბრა.

"არამარტო აქ ვიდგები, არამედ პროკურატურასთან, შინაგან საქმეთა სამინისტროსთან. თუ ვინმესთან მისასვლელი იქნება ყველგან მივალ და გამოვითხოვ იმ საბუთებს, ძიების მიმდინარეობას და გავეცნობი, რასაც თვითონ მიმალავენ და საერთოდ არაფრად მაგდებენ", — ამბობს შვილმოკლული მამა.

სარალიძის თქმით, ბოლო 3 თვის განმავლობაში მას არ აწვდიან ინფორმაციას გამოძიების შესახებ. მისივე თქმით, არც ის იცოდა, რომ პროკურორი შეიცვალა და ამის შესახებ სასამართლოს სხდომაზე გაიგო.

შვილმოკლული მამა ამბობს, რომ პროკურორმა მისი ვერგაცნობის მიზეზად მოუცლელობა დაასახელა. სარალიძეს მიაჩნია, რომ საეჭვოა მოასწრო თუ არა პროკურორმა 10 ტომიანი საქმის შესწავლა.

ხორავას ქუჩაზე მომხდარი მკვლელობიდან 1 წელი გავიდა. ამ დრომდე დაუდგენელია თუ ვინ მოკლა არასრულწლოვანი დავით სარალიძე. შვილმოკლული მამა მთელი წელია მკვლელების დასჯას და სამართლიანი გამოძიების წარმოებას ითხოვს.

გაიგეთ მეტი: