საქართველოს მეხუთე პრეზიდენტი სალომე ზურაბიშვილი ორბელიანების რეზიდენციაში იმუშავებს. ავლაბრის რეზიდენცია პრეზიდენტებისთვის დაიხურება. ჯერჯერობით უცნობია, რა განთავსდება შენობაში. გადაწყვეტილება მთავრობამ უნდა მიიღოს.

რუსთავი 2-ის ცნობით, უკვე დაიწყო ორბელიანების რეზიდენციის ინაუგურაციისთვის მომზადება. შენობაში კოსმეტიკური რემონტი ტარდება, მის გარეთ კი ქუჩის რეაბილიტაცია მიმდინარეობს. თბილისის მერის, კახა კალაძის თქმით, სამუშაოები პრეზიდენტის ინაუგურაციამდე უნდა დასრულდეს. ორბელიანების სასახლე თბილისის მერმა, კახა კალაძემ და პარლამენტის თავმჯდომარემ, ირაკლი კობახიძემ უკვე დაათვალიერა.

ზურაბიშვილს არასდროს დაუმალავს, რომ ავლაბრის რეზიდენციაზე პრეზიდენტობის შემთხვევაში უარს იტყოდა. ისიც კი თქვა, რომ ამ რეზიდენციის ჰავა და აურა არ უხდება.

ავლაბრის რეზიდენციაში მუშაობას რომ არ აპირებს დღეს, 29 ნოემბერს კიდევ ერთხელ თქვა სალომე ზურაბიშვილმა: "მე ორბელიანის სასახლე, როგორც იცით, ჩემი ოჯახს წინაპრები ბარათაშვილი-ორბელიანები იყვნენ და ორბელიანის სასახლე ჩემთვის არის მისაღები. თუ ჩვენ გვინდა ევროპულობა, ეს ბევრად უფრო ევროპული ყაიდის სასახლეა, ვიდრე ეს მასშტაბური შენობა, რომელიც სხვა სისტემას მაგონებს".

ქართული ოცნების საარჩევნო დაპირების მიხედვით, ათონელის ქუჩაზე მდებარე ორბელიანების სასახლეში უნდა გადასულიყო საქართველოს პრეზიდენტის ადმინისტრაცია. 2013 წლის არჩევნების დასრულების შემდეგ გიორგი მარგველაშვილმა განაცხადა, რომ არ აპირებს ადმინისტრაციის ავლაბრიდან გადატანას. ეს საკითხი გრძელვადიანი დაპირისპირების საგანიც კი გახდა. ივანიშვილის მთავარი არგუმენტი იყო ის ხარჯი, რაც ავლაბრის რეზიდენციის შენახვას სჭირდებოდა. მისი თქმით ეს იყო "ჭარბი ფართი".

საქართველოს არჩეული პრეზიდენტის, სალომე ზურაბიშვილის ინაუგურაცია 16 დეკემბერს გაიმართება. ქვეყნის ახალი პრეზიდენტის მიერ ფიცის დადებისა და უფლებამოსილებაში შესვლის ცერემონია კონსტიტუციის მიხედვით, პრეზიდენტის არჩევის დღიდან მესამე კვირა დღეს იმართება. სალომე ზურაბიშვილის მიერ პრეზიდენტის ფიცის დადებისთანავე წყდება მოქმედი პრეზიდენტის, გიორგი მარგველაშვილის უფლებამოსილება.

საქართველოს ცენტრალურმა საარჩევნო კომისიამ ხმების 100 პროცენტი დათვალა. ამ მონაცემებით, პრეზიდენტი სალომე ზურაბიშვილი ხდება.

პრეზიდენტობის კანდიდატებს შორის ხმები პროცენტულად ასე გადანაწაილდა::

• ზურაბიშვილი — 59,52%;
• ვაშაძემ — 40,48%.

პირველ ტურში მიღებული ხმები საკმარისი არ აღმოჩნდა რომელიმე კანდიდატის პრეზიდენტად ასარჩევად. მაშინ ზურაბიშვილი ვაშაძეს 14 348 ხმით უსწრებდა.

პირველი ტურში კანდიდატებს შორის ხმები ასე გადანაწილდა:

• ზურაბიშვილი — 615 572 ხმა (38,64%);
• ვაშაძე — 601 224 (37,74%).