თბილისის მერიამ რუსთაველის გამზირზე, პარლამენტის შენობის წინ შადრევნის გარემონტება გადაწყვიტა. სარეაბილიტაციო სამუშაოების პროექტის მოსამზადებლად, მერიამ 19 706 ლარის ღირებულების პროექტი გამოაცხადა. სატენდერო პირობების თანახმად, წინადადებების მიღება 30 ნოემბერს დაიწყება და 3 დეკემბერს დასრულდება.

საპროექტო ობიექტის აღწერაში მითითებულია, რომ პარლამენტის შენობის წინ მოედანზე, განთავსებულია შადრევანი, რომლის სატუმბი სადგური მდებარეობს მიწის ქვეშ. ატმოსფერული ნალექების მოსვლის დროს კი წყალი ჟონავს, რაც საფრთხეს უქმნის და აზიანებს მიწისქვეშ განთავსებულ სატუმბ სადგურს:

"საჭიროა საპროექტო ტერიტორიის ჰიდროლოგიური, ჰიდროგეოლოგიური ან/და სხვა კვლევა, რათა თავიდან იქნას აცილებული წყლის ჩაჟონვით ნაგებობის დაზიანება".

პარლამენტის შენობის წინ, შადრევნებიდან რამდენიმე მეტრში უკვე რამდენიმე თვეა შვილმკვდარი მამების, ზაზა სარალიძისა და მალხაზ მაჩალიკაშვილის საპროტესტო აქცია გრძელდება. მათ ადგილზე კარვები აქვთ გაშლილი და აცხადებენ, რომ მოთხოვნების დაკმაყოფილებამდე პროტესტს არ შეწყევეტენ.

თბილისის მერიამ მათ პარლამენტის წინ მდებარე ტერიტორიის დაკავების უფლება არ გაუგრძელა დეკემბრის ბოლომდე, რის მიზეზადაც საახალწლო ნაძვის ხის დადგმა დაასახელა. მერმა კახა კალაძემ სარალიძესა და მაჩალიკაშვილს ქალაქში პროტესტისთვის ისეთია დგილის დაკავება ურჩია, სადაც საახალწლო ღონისძიებები დაგეგმილი არ იქნებოდა.

ზაზა სარალიძის თქმით, მიუხედავად ყველაფრისა, ისინი არ დატოვებენ პროტესტის ადგილს.