შინაგან საქმეთა სამინისტრომ საქართველოში ნარკოტიკული საშუალების უკანონოდ შემოტანის ბრალდებით 1975 წელს დაბადებული პირი დააკავა. ჩადენილი დანაშაული 15-დან 20 წლამდე ან უვადო თავისუფლების აღკვეთას ითვალისწინებს.

პოლიციის ინფორმაციით, ბრალდებულმა სარფის საბაჟო პუნქტის გავლით, საქართველოში განსაკუთრებით დიდი ოდენობით ნარკოტიკი უკანონოდ შემოიტანა. სამართალდამცველებმა ბრალდებული აჭარაში დააკავეს.

უწყების თქმით, დაკავებულის პირადი ჩხრეკისას ამოღებულია: 105 აბი "სუბოქსინი" და ნარკოტიკული საშუალება "ჰეროინი".

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის და საქართველოში შემოტანის ფაქტზე, საქართველოს სისხლის სამართლის კოდექსის 260-ე მუხლის მე-6 ნაწილის "ა" ქვეპუნქტითა და 262-ე მუხლის მე-4 ნაწილის "ა" ქვეპუნქტით მიმდინარეობს.