მმართველი გუნდის მიერ მხარდაჭერილმა კანდიდატმა, სალომე ზურაბიშვილმა საგანგებო ბრიფინგზე ქართულ ჯარს მიმართა. მისი განცხადებით, იქნება გარანტი, რომ ჯარის ერთიანობისა და სახელმწიფოს მიმართ ერთგულების ხელყოფა არ მოხდეს.

ზურაბიშვილი ამბობს, რომ სახელმწიფოებრივი ამოცანაა ჯარის პოლიტიკური ნეიტრალიტეტის დაცვა.

"ჩვენი ჯარისკაცების ღირსებაზე მეტყველებს, რომ სხვადასხვა უღირსი მცდელობის მიუხედავად ვერავინ შეძლო ჯარის პოლიტიკური ნიშნით დაყოფა და ჯარში რაიმე დაპირისპირების შეტანა. ქართული ჯარის ერთიანობის, ნეიტრალიტეტისა და სახელმწიფოს მიმართ ერთგულების ხელყოფას ვერავინ ვერ შეძლებს, ამის გარანტი იქნება თქვენი პრეზიდენტი და უმაღლესი მთავარსარდალი", — განაცხადა ზურაბიშვილმა საგანგებო ბრიფინგზე.

სალომე ზურაბიშვილმა ქართული ჯარის ღვაწლის აღსანიშნავად1918-1921 წლები, ასევე 1990-იანი წლები და აგვისტოს ომი გაიხსენა. მან ხაზი გაუსვა სამშვიდობო მისიებში ქართველი ჯარისკაცების მნიშვნელოვან როლსაც.

აგვისტოს ომზე სალომე ზურაბიშვილის განცხადებების გამო სამხედროების ნაწილმა პრეზიდენტობის კანდიდატის მიმართ პროტესტი სოციალური კამპანიით გამოხატა. ისინი ფეისბუქზე საკუთარ ფოტოებს ტვირთავდნენ და წერდნენ: "მე ხმას არ ვაძლევ მოღალატეს, საქართველოს ომი არ დაუწყია".

აქცია მას შემდეგ დაიწყო, რაც ყოფილმა გენერალ-ლეიტენანტმა, 2008 წლის აგვისტოს ომის მონაწილე დევი ჭანკოტაძემ განაცხადა, რომ საქართველო არ უნდა ირჩევდეს პრეზიდენტად მას, ვინც ქვეყანას ომის დაწყებაში ადანაშაულებს. ქართული ოცნების გენერალურმა მდივანმა, კახა კალაძემ ჭანკოტაძის განცხადებას პოლიტიკურად მოტივირებული და სამარცხვინო უწოდა. თუმცა, სამხედროებმა გენერალს მხარდაჭერა გამოუცხადეს და გუშინ, 11 ნოემბერს საპრეზიდენტო კანდიდატის წინააღმდეგ კამპანია დაიწყეს.

11 ნოემბერს სალომე ზურაბიშვილმა საგანგებო ბრიფინგი გამართა, რომელზეც განაცხადა, რომ ყოფილი სამხედრო მოსამსახურეები მას და მის შვილებს სიცოცხლის ხელყოფით ემუქრებიან. ზურაბიშვილმა აღნიშნა, რომ აღნიშნული პირები ნაციონალურ მოძრაობასთან არიან დაკავშირებული.