არასამთავრობო ორგანიზაციების განცხადებით, პროკურატურის მოთხოვნა, რომ ყალბი პირადობის მოწმობების, სავარაუდო, ბეჭვდის საქმეზე წყარო დაასახელონ, შემაშფოთებელია.

მათივე თქმით, პროკურატურის განცხადება სისხლის სამართლებრივი პასუხისმგებლობის დაკისრების შესახებ ირიბი გზავნილია როგორც მათთვის, ასევე იმ ადამიანებისთვის, რომლებიც მათთან კონფიდენციალობის დაცვის პირობით თანამშრომლობენ.

სამი არასამთავრობო ორგანიზაციის განცხადებით, ინფორმაცია, რომ საპრეზიდენტო არჩევნების მეორე ტურისთვის სალომე ზურაბიშვილის მხარდასაჭერად, სავარაუდოდ, ყალბი პირადობის მოწმობები იბეჭდება, მათ სახელწმიფო სერვისების განვითარების სააგენტოს ერთ-ერთმა თანამშრომელმა უთხრა.

მთავარ პროკურატურაში ამბობენ, რომ საერთაშორისო გამჭვირვალობა-საქართველოდან ეკა გიგაურმა და საქართველოს ახალგაზრდა იურისტთა ასოციაციიდან ირმა პავლიაშვილმა გამოძიებასთან არ ითანამშრომლეს.

საგამოძიებო ორგანოს განმარტებით, გიგაური და პავლიაშვილი ვალდებულები არიან საქმისთვის მნიშვნელოვანი ინფორმაცია გასცენ და მათი ქმედება აღიქმება, როგორც მოწმის უარი, ნებაყოფლობით მიაწოდონ გამოძიებას ინფორმაცია.

17 არასამთავრობო ორგანიზაცია აღნიშნავს, რომ პროკურატურა იმ მიზანმიმართულ პოლიტიკას აგრძელებს, რომელსაც მთავრობა ბოლო პერიოდია აქტიურად ეწევა იმ არასამთავრობო ორგანიზაციების მიმართ, რომლებიც მისი გავლენის ქვეშ არ არიან მოქცეულნი.

"სიტყვისა და გამოხატვის თავისუფლების შესახებ საქართველოს კანონი არაორაზროვნად იცავს უფლებადამცველების უფლებას უარი თქვას ინფორმაციის წყაროს გამხელაზე", — წერია არასამთავრობოების განცხადებაში.

არასამთავრობო ორგანიზაციები მოუწოდებენ მთავარ პროკურატურას, გაიაზრონ ის პრინციპები, რომელიც განუყოფელია დემოკრატიული საზოგადოებისთვის.

ხელმომწერი არასამთავრობო ორგანიზაციები არიან:

  • საქართველოს დემოკრატიული ინიციატივა (GDI);
  • ინფორმაციის თავისუფლების ინსტიტუტი (IDFI);
  • დემოკრატიისა და უსაფრთხო განვითარების ინსტიტუტი (IDSD);
  • ღია საზოგადოების ფონდი (OSGF);
  • კონსტიტუციის 42-ე მუხლი;
  • საფარი;
  • თანასწორობის მოძრაობა;
  • ინიციატივა მოწყვლადი ჯგუფების რეაბილიტაციისთვის (RIVG);
  • პარტნიორობა ადამიანის უფლებებისთვის (PHR);
  • მედიის განვითარების ფონდი (MDF);
  • საქართველოს რეფორმების ასოციაციის (GRASS);
  • ადამიანის უფლებათა ცენტრი (HRC);
  • ცენტრი ემპათია;
  • საქართველოს გაეროს ასოციაცია (UNAG);
  • ტოლერანტობისა და მრავალფეროვნების ინსტიტუტი (TDI);
  • წამების მსხვერპლთა ფსიქოსოციალური და სამედიცინო რეაბილიტაციის ცენტრი - GCRT.