აუდიტის სახელმწიფო სამსახური "არა ნაცებს! არა ბოროტებას" ბანერის შესწავლა დაიწყებს. როგორც უწყების პრესსამსახურში On.ge-ს უთხრეს, უნდა დადგინდეს ვისი დაკვეთით არის ბანერი გაკეთებული და არის თუ არა ის შემოწირულობა.

ახალი ბილბორდები თბილისის ქუჩებში 18 ნოემბერს გაჩნდა. ბანერებზე წარწერაა დატანილი, "არა ნაცებს! არა ბოროტებას!" და მათზე მიხეილ სააკაშვილი, ვანო მერაბიშვილი, ბაჩო ახალაია, ნიკა გვარამია, ზურაბ ადეიშვილი და სხვები არიან გამოსახულნი.

თავდაპირველად ვრცელდებოდა ინფორმაცია, რომ ბილბორდის ავტორი პატრიოტთა ალიანსი იყო. თუმცა On.ge-სთან საუბარში პარტიის ლიდერმა და დეპუტატმა, ირმა ინაშვილმა განაცხადა, რომ ბილბორდი მათ არ ეკუთვნით:

"მე ვიზიარებ სულისკვეთებას, არა ნაციონალურ მოძრაობას, არა წარსულში დაბრუნებას და არა იმ რეჟიმის განმეორებას, მაგრამ ხაზგასმით ვამბობ, რომ კონკრეტულად ეს ბანერები, "არა ნაცებს!, არა ბოროტებას!" არ ეკუთვნის ჩვენს პარტიას. ჩვენ არ ვართ ამ ბანერების გავრცელების ორგანიზატორები".

ენმ-ის საწინააღმდეგო ბილბორდების შეკვეთა უარყო ქართულმა ოცნებამაც. პარტიის პრესსამსახურში ამბობენ, რომ მათი დაკვეთით არ გაკეთებულა, თუმცა ინფორმირებული იყვნენ ამის თაობაზე. პარტიაში აცხადებენ, რომ ბილბორდები კერძო ინიციატივაა.