თავდაცვის სამინისტრო ადასტურებს, რომ სამხედრო-სავალდებულო სამსახურში გაწვევის შეჩერების შესახებ ყოფილი მინისტრის, თინა ხიდაშელის მიერ გამოცემული ბრძანება არ შეცვლილა. ინფორმაციას Interpressnews ავრცელებს.

დღეს უსუფაშვილი - რესპუბლიკელების ზესტაფონის მაჟორიტარობის კანდიდატმა და ყოფილი თავდაცვის მინისტრმა, თინა ხიდაშელმა განცხადება გაავრცელა, რომელშიც აღნიშნა, რომ მოსახლეობასთან შეხვედრების დროს ირკვევა, რომ ადგილობრივი ხელისუფლების წარმომადგენლები მოქალაქეებს აწვდიან ინფორმაციას, თითქოს თინა ხიდაშელს სავალდებულო სამხედრო სამსახური არ გაუუქმებია და შესაბამისად, გაწვევა გრძელდება ჩვეულებრივ:

"ბოლო ერთი კვირის მანძილზე, პრაქტიკულად ყველა სოფელში, შეხვედრების დროს, მოსახლეობა გვაწვდის ერთსა და იმავე ინფორმაციას. ადგილობრივი ხელისუფლების წარმომადგენლები მოსახლეობას უცხადებენ, რომ თავდაცვის მინისტრობის პერიოდში, თინა ხიდაშელს არ მიუღია გადაწყვეტილება სავალდებულო გაწვევის გაუქმების შესახებ და შესაბამისად, გაწვევა გრძელდება ჩვეულებრივი წესით".

ის განმარტავს, რომ აღნიშნული სიმართლეს არ შეესაბამება:

"ყველა დაინტერესებული პირის საყურადღებოდ, კიდევ ერთხელ ვაცხადებთ, რომ თინათინ ხიდაშელის მიერ, თვადაცვის მინისტრობის დროს გამოცემული ბრძანების შესაბამისად, შეიარაღებულ ძალებში გაწვევა გაუქმებულია. ჩვენი ინფორმაციით, აღნიშნული გადაწყვეტილება ძალაშია და შესაბამისად, ყოველგვარი ქმედება შეიარაღებულ ძალებში ახალგაზრდების გაწვევის თაობაზე უკანონოა".

27 ივნისს თინა ხიდაშელმა მედიასთან გამართულ შეხვედრაზე ხელი იმ გადაწყვეტილებას მოაწერა, რომლის თანახმადაც, თავდაცვის სამინისტრო სავალდებულო სამხედრო სამსახურში მოქალაქეებს აღარ გაიწვევს.

თუმცა, როგორც On.ge-ს თავდაცვის სამინისტროში განუმარტეს, აღნიშნული ცვლილება სამხედრო მოსამსახურეთა მხოლოდ იმ 25%-ს შეეხება, რომლებსაც სწორედ ეს უწყება იწვევდა ჯარში, დანარჩენ 75%-ს კი, რომელსაც შსს და სასჯელაღსრულების დეპარტამენტი იწვევს, ცვლილებები არ შეეხება.