აშშ-ის ფედერალურმა სასამართლომ დონალდ ტრამპის ადმინისტრაციას CNN-ის ჟურნალისტისთვის, ჯიმ აკოსტასთვის აკრედიტაციის დაბრუნება დაავალა. როგორც CNN წერს, რომ ეს მნიშვნელოვანი გამარჯვებაა.

ეს საქმეზე საბოლოო გადაწყვეტილება არაა. ტელეარხის სურს დაამტკიცოს, რომ თეთრმა სახლმა აკოსტასთვის აკრედიტაციის ჩამორთმევით ამერიკის კონსტიტუციის პირველი და მეხუთე შესწორება დაარღვია. აკოსტას კი აკრედიტაცია საბოლოო გადაწყვეტილებამდე აღუდგება, ეს კი ნიშნავს, რომ ჟურნალისტი ტრამპის ადმინისტრაციაში სამუშაოდ დაბრუნდება.

CNN-მა თეთრი სახლის ადმინისტრაციას 13 ნოემბერს უჩივლა. საჩივარში, რომელიც ვაშინგტონის საოლქო სასამართლოში შევიდა, ნათქვამია, რომ ჯიმ აკოსტას თეთრი სახლის საშვი "უსამართლოდ" ჩამოერთვა. CNN-ს მხარი დაუჭირა კონკურენტმა მედიამ Fox News-მაც.

ჯიმ აკოსტა CNN-ის ერთ-ერთი წამყვანი ჟურნალისტია. მას საშვი თეთრი სახლის ოფიციალურმა პირებმა 7 ნოემბერს პრეზიდენტ ტრამპთან გამართულ პრესკონფერენციაზე დასმული კითხვის შემდეგ ჩამოართვეს.

კითხვა, რომელზე პასუხსაც ჟურნალისტი დაბეჯითებით ითხოვდა, მიგრანტების იმ ქარავანს შეეხებოდა, რომელიც შეერთებულ შტატებს სამხრეთ საზღვართან უახლოვდება. აკოსტა კითხვაში პრეზიდენტს დაბეჯითებით სთხოვდა დაესაბუთებინა, თუ რატომ უწოდა ტრამპმა იმიგრანტთა ამ ნაკადს ქვეყანაზე "თავდასხმა".

თეთრი სახლი თავის მხრივ აცხადებს, რომ CNN-ის ჟურნალისტი პრესკონფერენციაზე ხელით უხეშად შეეხო ქალს, რომელსაც მიკროფონი სხვა ჟურნალისტისთვის უნდა გადაეცა. თუმცა, ვიდეოჩანაწერზე არ ჩანს, რომ აკოსტა თეთრი სახლის თანაშემწეს აგრესიულად ექცეოდა.

თეთრი სახლის კორესპონდენტთა ასოციაცია მხარს უჭერს ჯიმ აკოსტას. ორგანიზაცია აცხადებს, რომ ჟურნალისტისთვის საშვი თავიდანვე არ უნდა ჩამოერთმიათ და საერთოდ, "შეერთებული შტატების პრეზიდენტს არაფერი არ უნდა ესაქმებოდეს იმ კაცის თუ ქალის შერჩევასთან, ვინც მის პრესკონფერენციას აშუქებს".

დონალდ ტრამპი პოლიტიკაში შებიჯების დღიდან, ჟურნალისტებზე ვერბალური თავდასხმებით გამოირჩევა. პრეზიდენტი მედიას სისტემატურად უწოდებს "ყალბს" და "უსამართლოს". ყველაზე დიდი რეზონანსი გამოიწვია მისმა შეფასებებმა, როცა მედიის რამდენიმე წარმომადგენელს ტრამპმა "ხალხის მტერი" უწოდა, ტერმინი, რომელსაც საბჭოთა რეჟიმი მილიონობით ადამიანის გასასამართლებლად და დასახვრეტად იყენებდა