საპრეზიდენტო კანდიდატის სალომე ზურაბიშვილის მხარდამჭერი ქართული ოცნების ბანერების საკითხის აუდიტის სამსახური შეისწავლის.

როგორც აუდიტის პრესსამსახურმა On.ge-ს განუმარტა, ისინი ორივე მხარისგან გამოითხოვენ ინფორმაცია ფინანსურ ხარჯებთან დაკავშირებით. კანონის მიხედვით, არასამეწარმეო იურიდიული პირისგან, ამ შემთხვევაში პარტიისგან, შემოწირულობის მიღება აკრძალულია.

აუდიტის სამსახურის თქმით, ამ ეტაპზე თქმა არა შეუძლიათ რა სახის შემოწირულობასთან აქვთ საქმე.

დღეს, 15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი და პარლამენტის თავმჯდომარე, ირაკლი კობახიძე არიან გამოსახული.

საქართველოს პრემიერ-მინისტრის, მამუკა ბახტაძის განცხადებით, არაფერია განსაკუთრებული, რომ ქართული ოცნება სალომე ზურაბიშვილის საარჩევნო კამპანიაშია ჩართული, მათ შორის ბიძინა ივანიშვილიც. ასე გამოეხმაურა მამუკა ბახტაძე საარჩევნო ბილბორდების საკითხს, სადაც სალომე ზურაბიშვილი ქართული ოცნების ლიდერებმა ჩაანაცვლეს.

"თქვენ რა მიგაჩნიათ განსაკუთრებულად იმაში, რომ ქართული ოცნება, როგორც პირველ ტურში, ასევე მეორე ტურში, მხარს უჭერს სალომე ზურაბიშვილს და ჩართულია წინასაარჩევნო პროცესებში, მათ შორის მისი დამფუძნებელი, ბიძინა ივანიშვილიც. სალომე ზურაბიშვილის ბანერები არ შეგიმჩნევიათ სხვაგან? არის ახალი ბანერები, არის სალომე ზურაბიშვილის ბანერებიც", — განაცხადა მამუკა ბახტაძემ.