დიდმა ბრიტანეთმა და ევროკავშირმა ბრექსიტის შეთანხმების წინასწარ ტექსტზე შეთანხმებას მიაღწიეს. BBC-ის ინფორმაციით, ინტენსიური მოლაპარაკებების შემდეგ დოკუმენტი ოფიციალურმა პირებმა ტექნიკურ დონეზე შეათანხმეს.

14 ნოემბერს დიდი ბრიტანეთის მთავრობის სპეციალური სხდომა გაიმართება, რომელზეც პრემიერ-მინისტრმა, ტერეზა მეიმ მინისტრებმა დოკუმენტის პროექტის მხარდაჭერისკენ უნდა მოუწოდოს.

შეთანხმებით უკმაყოფილოა ბრექსიტის მომხრე და საგარეო საქმეთა ყოფილი მინისტრი ბორის ჯონსონი, რომელიც მოუწოდებს მინისტრთან კაბინეტს, მხარი არ დაუჭიროს აღნიშნულ დოკუმენტს.

დიდი ბრიტანეთის ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.

გარდა ამისა, უთანხმოების ერთ-ერთი მთავარი საკითხი იყო ჩრდილოეთ ირლანდიისა და ირლანდიის რესპუბლიკის საზღვარი. მხარეები ვერ თანხმდებოდნენ ბრექსტისის შემთხვევაში როგორ აეცილებინათ საზღვარზე ფიზიკური შემოწმება.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. იმ შემთხვევაში თუ მხარეები შეთანხმებას ვერ მიაღწევენ, ეს საზღვარი ფაქტობრივად გახდება საზღვარი ევროკავშირსა და დიდ ბრიტანეთს შორის.

რამდენიმე პარლამენტარის მოწოდების მიუხედავად ტერეზა მეი აცხადებდა, რომ ბრექსიტის საკითხზე მეორე რეფერენდუმი არ ჩატარდება. თუ მხარეები საბოლოო შეთანხმებას მიაღწევენ, ის დაამტკიცონ ევროპარლამენტმა და ბრიტანელმა კანონმდებლებმა.