Wizz Air-ის ინფორმაციით, ბრალდება, რომ 12 ნოემბერს დაგეგმილ რეისზე W6 6412 (მილანი მალპენსა - ქუთაისი ) თვითმფრინავის ბორტზე ხელმისაწვდომ ადგილებზე მეტი ბილეთი გაიყიდა, სიმართლეს არ შეესაბამება და მგზავრების ნაწილის აეროპორტში დატოვება რეგისტრაციის დროს წარმოქმნილმა პრობლემებმა განაპირობა.

ვიზეარი გავრცელებულ განცხადებაში წერს, რომ ზოგიერთი მგზავრი აეროპორტში დროულად არ გამოცხადდა, ზოგიერთმა მგზავრმა კი რეგისტრაციის დროს უარი თქვა ბარგის მოსაკრებლის გადახდაზე, რამაც მნიშვნელოვნად შეაფერხა რეგისტრაციის პროცედურა მილანის მალპენსას აეროპორტში.

"აღნიშნულიდან გამომდინარე, რამდენიმე მგზავრმა რეგისტრაციის გავლა დადგენილ ვადაში ვერ მოახერხა და ვერ მოხვდა ავიახომალდის ბორტზე", — ნათქვამია განცხადებაში.

Wizz Air ყველა მგზავრს სთხოვს, გამგზავრების აეროპორტში გამოცხადდეს მინიმუმ 2 საათით ადრე, ჩასხდომის გასასვლელთან კი მინიმუმ 40 წუთით ადრე.

ავიაკომპანია ვიზეარის რეისზე მილანი-ქუთაისი, მგზავრთა 35-კაციანი ჯგუფი არ აუშვეს. ამის შესახებ On.ge-სთან საუბარში ერთ-ერთი მგზავრი, ლევან კილაძე ჰყვება.

მისი თქმით, კომპანიამ მათი დარეგისტრირება ვერ მოასწრო, ბარგი მიიღო და თვითმფრინავში აღარ აიყვანა. მგზავრი აცხადებს, რომ აეროპორტში ორი საათით ადრე მივიდა და ბარგის ჩაბარებიდან გასასვლელამდე მისასვლელად სულ სამი წუთი დასჭირდა. მგზავრები იტალიაში რაგბის მატჩზე დასასწრებად იყვნენ ჩასული.