პარლამენტის პლენარული სხდომის გახსნისას, უმრავლესობის დეპუტატებმა კვორუმის შეკრების მიზნით, სავარაუდოდ, ერთმანეთის პულტები გამოიყენეს. ამის შესახებ პლენარულ სხდომათა დარბაზში ევროპული საქართველოს დეპუტატებმა განაცხადეს. საქართველოს პარლამენტში ქვეყნის მთავარი ფინანსური დოკუმენტი — საქართველოს ბიუჯეტი უნდა განეხილათ.

პლენარული სხდომის დაწყებამდე რეგისტრაცია სხდომის თავმჯდომარემ, ვიცე-სპიკერმა გია ვოლსკიმ სამჯერ გამოაცხადა. პირველ ჯერზე რეგისტრაცია 79-მა დეპუტატმა გაიარა, თუმცა როგორც უმცირესობის წევრმა ირმა ნადირაშვილმა განაცხადა, ამ რაოდენობის დეპუტატი სხდომათა დარბაზში არ იმყოფებოდა. თავად ევროპულმა საქართველომ კი რეგისტრაცია პროტესტის ნიშნად არ გაიარა. საკითხის გარკვევა მანდატურის სამსახურს დაევალა, რისთვისაც 5-წუთიანი ტექნიკური შესვენება გამოცხადდა.მანდატურის ინფორმაციით დარბაზში არის 80 დეპუტატი, რომელთა ნაწილმა რეგისტრაციის გავლა ვერ მოასწრო.

მეორე ჯერზე, რეგისტრაცია 78 დეპუტატმა გაიარა. მათ შორის ისევ არ იყვნენ ევროპული საქართველოს დეპუტატები.

ირმა ნადიაშვილის თქმით, ევროპული საქართველოს 8 დეპუტატმა რეგისტრაცია მიზანმიმართულად არ გაიარა, რადგან ეჩვენებინა, რომ მმართველ გუნდს ბიუჯეტის განხილვის პლენარულ სხდომაზე კვორუმი არ აქვს.

"ბიუჯეტი მთავარი საფინანსო დოკუმენტია და უმრავლესობის პასუხისმგებლობაა დაესწროს სხდომას. ნუ დაიწყებთ დარღვევით მთავარი საფინანსო დოკუმენტის განხილვას. მადლობა, არ ხართ დაბრაზში", — განაცხადა ირმა ინაშვილმა.

გია ვოლსკის თქმით, ქართული ოცნების დეპუტატებმა, ეკა ბესელიამ, გოჩა ენუქიძემ, რომან კაკულიამა და გოდერძი ჩანქსელიანმა გარკვეული მიზეზის გამო რეგისტრაცია ვერ გაიარეს.

ევროპული საქართველოს დეპუტატის, სერგო რატიანის თქმით, ნუკრი ქანთარიას გავლილი აქვს რეგისტრაცია, თუმცა დარბაზში არ არის, რაც ნიშნავს, რომ მისი პულტი სხვამ გამოიყენა.

ეკა ბესელიამ განმარტა, რომ რეგისტრაცია გაიარა, თუმცა სისტემამ არ ასახა. მისივე თქმით, რეგლამენტში წერია, რომ სავალდებულოა, საპარლამენტო სიითი შემადგენლობის უმრავლესობა ესწრებოდეს სხდომას.

"არსად არ წერია, რომ რეგისტრაციას მხოლოდ უმრავლესობის წევრები გადიან და ეს არ ეხება საპარლამენტო ოპოზიციას. სხდომის ჩაშლას ცდილობენ. რეგისტრაცია უნდა გაიარონ და სხდომის ჩატარებას ხელი არ უნდა შეუშალონ", — განაცხადა ბესელიამ.

ევროპული საქართველოს დეპუტატმა, ზურაბ ჭიაბერაშვილმა დაადასტურა, რომ მათი მხრიდან რეგისტრაციის არგავლა პოლიტიკური ნაბიჯია.

"გვინდა, ვაჩვენოთ მთელ საზოგადოებას, რომ პოლიტიკური პარტია ქართული ოცნება ვერ კრებს საკმარის რაოდენობას ხმებისას, როცა იხილება ქვეყნის მთავარი საფინანსო დოკუმენტი", — განაცხადა დეპუტატმა.

სხდომის თავმჯდომარემ, გია ვოლსკიმ 10-წუთიანი ტექნიკური შესვენება გამოაცხადა, რათა რეგისტრაცია კიდევ ერთხელ გაევლოთ. შესვენების დასრულების შემდეგ, სხდომის თავმჯდომარემ ბიუჯეტის განხილვა 16:00-მდე გადადო.