გაერთიანებული ოპოზიციის, ძალა ერთობაშიას საპრეზიდენტო კამპანიის ხელმძღვანელი გიორგი ვაშაძე ამბობს, რომ ქართული ოცნება გადაიქცა არა კანონდამცველად, არამედ კანონდამრღვევად. ამის შესახებ მან ბრიფინგზე განაცხადა, სადაც რუსთაველის გამზირზე გუშინ, 10 ნოემბერს განვითარებულ მოვლენებს გამოეხმაურა.

ვაშაძე აცხადებს, რომ ხელისუფლება დანაშაულებრივ ორგანიზაციად იქცა. ის სამარცხვინოს უწოდებს დედაქალაქის მერის წერილს, რომლის მიხედვითაც შვილმოკლულმა მამებმა საახალწლო სამზადისისა და ნაძვის ხის დადგმის გამო პარლამენტის შენობის მიმდებარე ტერიტორია უნდა დატოვონ.

"მათ დაარღვიეს საქართველოს კონსტიტუციის 25-ე მუხლი, რომლითაც გარანტირებულია შეკრების თავისუფლება, მათ დაარღვიეს ევროკონვენციის მე-11 მუხლი, რომლითაც გარანტირებულია შეკრებებისა და გაერთიანების თავისუფლება და დაარღვიეს საქართველოს კანონი შეკრებისა და მანიფესტაციების შესახებ. თუ ვინმეს ჰგონია, რომ კანონი ხართ თქვენ, ასე არ იქნება ამ ქვეყანაში", — განაცხადა ვაშაძემ.

ის შს მინისტრის განცხადებასაც გამოეხმაურა და განაცხადა, რომ გიორგი გახარიას განცხადებები დესტაბილიზაციისა და არეულობის საფრთხეების შესახებ საზოგადოების შეცდომაში შეყვანას ისახავს მიზნად.

"თქვენ გვეუბნებით, რომ კანონი არ ხართ თქვენ, ეს დამთავრდება აუცილებლად და თქვენ ამაზე აუცილებლად მიიღებთ პასუხს. ხელისუფლება, რომელსაც არაფერში აინტერესებს კონსტიტუციისა და კანონის მოთხოვნა, აუცილებლად მიიღებს საკადრის პასუხს მოსახლეობისგან არჩევნების გზით. ქართული ოცნება გადაიქცა არა კანონდამცველად,როგორც ხელისუფლებაში მყოფი ძალა, არამედ კანონდამრღვევად", – განაცხადა ვაშაძემ ბრიფინგზე.

თბილისის მერიამ 5 ნოემბერს შვილმკვდარ მამას, ზაზა სარალიძეს, რომელიც შვილის მკვლელების დასჯას ითხოვს, წერილი მისწერა. წერილში მერია ითხოვს, რომ სარალიძემ აქცია თბილისში, პარლამენტის შენობის მიმდებარე ტერიტორიის ნაცვლად სხვა ადგილზე გამართოს.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

ზაზა სარალიძისთვის კონსტიტუციური უფლების, კარვის გაშლის შეზღუდვის გამო 10 ნოემბერს აქცია გამართეს არასამთავრობო ორგანიზაციებმა. პოლიციის წინააღმდეგობისა და დაპირისპირების მიუხედავად, თბილისში, რუსთაველის გამზირზე, პარლამენტის შენობის წინ არასამთავრობოებმა პროტესტის ნიშნად კარვები მაინც გაშალეს. ასევე შეიქმნა პეტიცია "უარს ვამბობ ნაძვის ხეზე, ვირჩევ ადამიანს!". თბილისის მერია გამოეხმაურა რუსთაველის გამზირზე მიმდინარე პროტესტს და განაცხადა, რომ პროტესტისთვის ადგილის ცვლილება იყო თხოვდა და დანარჩენი აქციის მონაწილეების პრეროგატივაა.