ქართული ოცნება ნაციონალურ მოძრაობას საზღვარგარეთ ამომრჩეველზე ზეწოლაში ადანაშაულებს. ამის შესახებ დეპუტატმა სოფიო ქაცარავამ, დღეს, 10 ნოემბერს შტაბში გამართულ საგანგებო ბრიფინგზე ისაუბრა. მისივე თქმით, საზღვარგარეთ მცხოვრებ საქართველოს მოქალაქეებს ენმ საკონსულოს სახელით სთხოვს, ქართულ ოცნებას მისცენ ხმა, რათა შემდეგ ამით სპეკულაცია შეძლონ.

დღესვე გამართულ ბრიფინგზე, გაერთიანებული ოპოზიციის შტაბის ხელმძღვანელმა, გიორგი ვაშაძემ მმართველი გუნდის ბრალდებას "არაადეკვატური" უწოდა.

"მსოფლიოს სხვადასხვა ქალაქში ნაციონალურ მოძრაობას შექმნილი აქვს სპეციალური ჯგუფები ე.წ. მიკრო შტაბები, რომელთა მეშვეობითაც, საკონსულოებსა და საელჩოების სახელით, საზღვარგარეთ მცხოვრებ ჩვენს თანამემამულეებს უკავშირდებიან, მიზანმიმართულად ატყუებენ და ქართული ოცნების მხარდაჭერის სანაცვლოდ, უცხოეთში ლეგალურად ცხოვრების, მუშაობის, თუ თავშესაფრის მიღებისთვის საჭირო დახმარებას ჰპირდებიან", — ამბობს ქართული ოცნების დეპუტატი, სოფიო ქაცარავა.

ის ასევე აღნიშნავს, რომ ნაციონალური მოძრაობის აქტივისტები აღრიცხვაზე დადგომის მოტივით მოქალაქეებს პირად მონაცემებს ართმევენ, აქტიურად იყენებენ სოციალურ ქსელებს და ფეიქ გვერდების საშუალებით, ამ და სხვა ტიპის ინფორმაციის შემცველ ცნობებს ავრცელებენ.

გაერთიანებული ოპოზიციის შტაბის ხელმძღვანელის, გიორგი ვაშაძის თქმით, ამით ქართული ოცნება ცდილობს გაამართლოს ის, რომ სალომე ზურაბიშვილმა საზღვარგარეთის ზოგიერთ საარჩევნო უბანზე წააგო:

"მე მართლა წარმომიდგენია, რომ მეორე ტურში რომ გავიმარჯვებთ, ქართული ოცნება რუსთაველზე გამოვა და მიტინგს მოაწყობს იმისთვის, რომ გაერთიანებულმა ოპოზიციამ გააყალბა არჩევნებიო. ახლა უნდათ გაამართლონ ის, თუ რატომ წააგო თავის სამშობლოში საარჩევნო უბანი სალომე ზურაბიშვილმა... საკონსულოებიც მათია, კომისიებიც მათია, საარჩევნო უბნებიც მათია, ბიულეტინებსაც ისინი ბეჭდავენ, მაგრამ წააგეს".

არჩევნების მეორე ტური

2018 წლის საპრეზიდენტო არჩევნებზე ცესკომ ხმების 100% დაითვალა. მონაცემების მიხედვით, ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის მეორე ტური გაიმართება.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.