საქართველოს ფინანსთა მინისტრის მიხეილ მაჭავარიანის თქმით, არანაირი ეკონომიკური საფუძველი არ არსებობს, რის გამოც ლარი გაუფასურდება და ეს პროცესი ოპოზიციის აჟიოტაჟითაა გამოწვეული. ამის შესახებ ფინანსთა მინისტრმა ჟურნალისტებს მთავრობის სხდომის დასრულების შემდეგ განუცხადა.

"დღეს ლარი რა ნიშნულზეც არის, ამისთვის აბსოლუტურად არანაირი ეკონომიკური საფუძველი არ არსებობს. ეს არის ჩვეულებრივი აჟიოტაჟი, გამოწვეული იმ ბინძური კამპანიით, რომელსაც მეტწილად ოპოზიცია ატარებს, როგორც ვხედავთ. შესაბამისად, იმ არასტაბილურობის განცდით, რაც მოიტანა იმ რიტორიკამ და სიბინძურემ, რასაც ამჟღავნებენ ჩვენი ოპონენტები", — განაცხადა მინისტრმა.

მისივე თქმით, "ოდნავ ვისაც ესმის ეკონომიკა და შერჩენია ნამუსი", იციან, რომ ამას კავშირი არ აქვს ფისკალურ მდგომარეობასთან.

"როდესაც გამოდიან და ამბობენ, მთავრობის ეკონომიკური პოლიტიკის გამო არისო, ელემენტარული არითმეტიკა არ იციან", — განაცხადა მაჭავარიანმა.

მინისტრის განცხადებით, ლარი ნებისმიერ შემთხვევაში გამყარდება და გაცილებით მალე.

"მთავარია რამდენად რეზისტენტულია მოსახლეობა ამ ტყუილების მიმართ. რამდენადაც რეზისტენტულები ვიქნებით ამ სპეკულაციებისა და ტყუილების მიმართ, ზუსტად იმდენად მყარად იქნება ლარი", — განაცხადა ფინანსთა მინისტრმა.

ეროვნული ბანკის ბოლო ინფორმაციით, ერთი დოლარის ღირებულება 2.7505 ლარია.