ტერაქტის მომზადების ბრალდებით დაკავებული 7 მოქალაქის სასამართლო პროცესი საქალაქო სასამართლოში 4 საათზე გაიმართება. სუსის ინფორმაციით, დაკავებული 7 პირიდან 5 სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქებას გეგმავდა, 2 მათგანი კი, სავარაუდოდ, აღნიშნულ ფაქტს მალავდა.

დაკავებულები ამ დრომდე მოდულის შენობაში იმყოფებიან და მათთან ადვოკატები არ შესულან.

სახელმწიფო უსაფრთხოების სამსახურის ინფორმაციით, კონტრდაზვერვის დეპარტამენტმა ტერორისტული აქტი აღკვეთა. უწყების ცნობით, ტერორისტული აქტის ჯგუფურად მომზადებისათვის და ტერორისტული მიზნით ცეცხლსასროლი იარაღის, საბრძოლო მასალისა და ფეთქებადი ნივთიერებების უკანონო შეძენა-შენახვის, ტარებისა და ამავე დანაშაულის ჩადენაში დახმარების ფაქტზე, საქართველოს 5 მოქალაქე დააკავეს.

გარდა ამისა, სამსახურებრივი უფლებამოსილების გადამეტების ფაქტზე, შსს-ს გენერალურ ინსპექციასთან ერთობლივად დაკავებულია საპატრულო პოლიციის მოქმედი თანამშრომელი, დანაშაულის შეუტყობინებლობის ფაქტზე და საქართველოს ერთი მოქალაქე.