აშშ-ში შუალედური არჩევნების შედეგების მიხედვით, რესპუბლიკური პარტია სენატში უმრავლესობას ინარჩუნებს. ბოლო მონაცემებით, რესპუბლიკელებს სენატში უკვე 51 ადგილი აქვთ, ხოლო დემოკრატებს — 43 ადგილი.

განსხვავებული შედეგი დაფიქსირდა წარმომადგენელთა პალატაში, სადაც დემოკრატები ლიდერობენ. ამ მომენტისთვის, დემოკრატებს კონგრესის ქვედა პალატაში 209 ადგილი ეკუთვნით, ხოლო რესპუბლიკელებს 191. უმრავლესობის მოპოვებისთვის დემოკრატებს 23 რეგიონში უნდა მოეგო, ჯამში კი მათ 23 რესპუბლიკურ რეგიონში გაიმარჯვეს.

პრეზიდენტმა, დონალდ ტრამპმა არჩევნების შედეგები "დიდ წარმატებად" შეაფასა.

6 ნოემბერს ამერიკელმა ამომრჩეველმა კონგრესის ორივე პალატის, სენატისა და წარმომადგენელთა პალატის წარმომადგენლები აირჩია. არჩევნებს შუალედური იმიტომ ჰქვია, რომ საპრეზიდენტო ვადის სწორედ შუაში იმართება.

ამომრჩეველს უნდა აერჩია წარმომადგენელთა პალატის ყველა, 435 წევრი და 100-დან 35 სენატორი. ასევე, ირჩევდნენ 50-დან 36 გუბერნატორს. არჩევნებამდე ორივე პალატაში უმრავლესობას რესპუბლიკური პარტია წარმოადგენდა, რომელიც პრეზიდენტ დონალდ ტრამპს უჭერს მხარს.

იმისათვის, რომ დემოკრატებს სენატში უმრავლესობა მოეპოვებინათ ორ რესპუბლიკურ შტატში უნდა მოეგოთ და არც ერთ თავის შტატში არ უნდა წაეგოთ. ამის გაკეთება კი მათ ვერ შეძლეს.

მაგალითად ტეხასში, დემოკრატმა ბეტო ო'რუკმა რესპუბლიკელ ტედ კრუზს დაუთმო. ამავე დროს, ფლორიდაში დემოკრატი სენატორი ნილ ნილსონი რესპუბლიკელ კანდიდატ რიკ სკოტთან აგებს.

არსებული შედეგები ჯერჯერობით პირველადია და პარტიების ზუსტი გადანაწილება რამდენიმე საათში იქნება ცნობილი. ექსპერტები მიიჩნევენ, რომ წარმომადგენლობით პალატაში დემოკრატებს 435-დან 230-მდე ადგილი ექნებათ.