სახალხო დამცველი, ნინო ლომჯარია მიიჩნევს, რომ გაერთიანებული ოპოზიციის საარჩევნო შტაბზე თავდასხმა, მნიშვნელოვნად აბრკოლებს წინასაარჩევნო გარემოს.

ლომჯარია ამბობს, რომ მნიშვნელოვანია, გამოძიების პროცესში შეფასება მიეცეს სავარაუდო პოლიტიკური მოტივის არსებობას და თუ საჭირო გახდება, შეიცვალოს დანაშაულის კვალიფიკაციაც.

"აუცილებელია მოხდეს დანაშაულის ჩამდენი ყველა პირის დროული იდენტიფიცირება და მათ მიმართ კანონით გათვალისწინებულ ღონისძიებათა გატარება", — ამბობს ლომჯარია.

გუშინ, 30 ოქტომბერს გაერთიანებულ ოპოზიციაში განაცხადეს, რომ საარჩევნო შტაბში მათი გუნდის წევრებს ქართული ოცნების 20-მდე წევრი ხელკეტებით დაესხა თავს. გუნდის განმარტებით, თავდასხმა იმიტომ მოხდა, რომ დაშავებულებს ცესკოში საჩივრები არ შეეტანათ.

შინაგან საქმეთა სამინისტროს განცხადებით, საქმეზე გამოძიება საქართველოს სისხლის სამართლის კოდექსის 239-ე მუხლის მეორე და მესამე ნაწილებითაა დაწყებული, რაც ცეცხლსასროლი იარაღის ან იარაღად სხვა საგნის გამოყენებით წინასწარი შეთანხმებით ჯგუფის მიერ ჩადენილ ხულიგნობას გულისხმობს.