გერმანიაში ყოფილმა სანიტარმა, ნილს ჰოგელმა სასამართლოს პირველ სხდომაზე აღიარა, რომ 100 პაციენტი მოკლა. 41 წლის სანიტარი ერთ-ერთია იმ სერიულ მკვლელებს შორის, რომელთაც ყველაზე ბევრი ადამიანის მკვლელობა აქვთ ჩადენილი.

ბრალდების მხარე ამბობს, რომ სანიტარი პაციენტებს წამლის ფატალურ დოზებს აძლევდა. ის ჩრდილოეთ გერმანიაში, ორ სხვადასხვა საავადმყოფოში მუშაობდა. ამის შესახებ ინფორმაციას BBC ავრცელებს.

პროკურორის განცხადებით, სანიტარის მოტივი თანამშრომლების გაოცება იყო იმით, თუ როგორ მოჰყავდა მას გონს გარდაცვალების პირას მყოფი პაციენტები.

სერიული მკვლელი ექვსი მკვლელობისთვის სამუდამო პატიმრობის სასჯელს უკვე იხდის. მას ამჟამად ოლდენბურგში 36, ხოლო დელმენჰორსტის შემოგარენში 64 პაციენტის მკვლელობა ედება ბრალად. ცნობილია, რომ აღნიშნული მკვლელობები მან 1999 წლიდან 2005 წლამდე პერიოდში ჩაიდინა.

მიმდინარე სასამართლო პროცესი, რომელიც მოკლულთათვის პატივის მისაგებად წუთიერი დუმილით დაიწყო, მაისის თვემდე გაგრძელდება.