ცენტრალურმა სარჩევნო კომისიამ ხმების ნახევარი დათვალა. წინასწარი შედეგებით მმართველი პარტიის საპრეზიდენტო კანდიდატს, სალომე ზურაბიშვილსა და გაერთიანებული ოპოზიციის კანდიდატს, გრიგოლ ვაშაძეს შორის სხვაობა 1,14 %-ია.

ამ დროის მონაცემებით დავით ბაქრაძემ ხმების 10,26%, შალვა ნათელაშვილმა 4%, ზურა ჯაფარიძემ 2,43%, დავით უსუფაშვილმა კი 2,3% მიიღო.

ცესკოს წინასწარი მონაცემები ახლოს არის რუსთავი 2-ის მიერ გავრცელებული ეგზიტპოლების შედეგებთან. ამ შედეგებიდან გამომდინარე არჩევნების მეორე ტური გაიმართება.

მეორე ტურის გამართვა აღიარა ქართული ოცნების თავმჯდომარემ, ირაკლი კობახიძემაც. მისი თქმით, მეორე ტურში ვაშაძე და ზურაბიშვილი გადავლენ.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.