საკუთარი აჩევანი დააფიქსირა ევროპული საქართველოს საპრეზიდენტო კანდიდატმა, დავით ბაქრაძემ. მისი თქმით, ამომრჩეველი მხარს დაუჭერს მშვიდობიან და ევროპულ ხვალინდელ დღეს.

"ვფიქრობ, რომ საზოგადოებას ნამდვილად სჭირდება ცვლილებები. საზოგადოებას სჭირდება უკეთესი და საიმედო ხვალინდელი დღე და რაც მთავარია სჭირდება, რომ საქართველოს მომავალი იყოს მშვიდობიანი და ყოველგვარი დაპირისპირების გარეშე", — განაცხადა ბაქრაძემ. ბაქრაძემ დაამატა ისიც, რომ არჩევნების მეორე ტური მოსალოდნელია და ის აპირებს გამარჯვებისთვის ბრძოლას.

საქართველოს მეხუთე პრეზიდენტის ასარჩევად არჩევნები დაიწყო. საარჩევნო უბნები საქართველოში რვა საათზე გაიხსნა.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის, 55 საზღვარგარეთ, 11 კი საგამონაკლისო წესით შექმნილი უბანია.

ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე.