მოძრაობა პარტიზანი მებაღეების წევრებმა პროკურატურაში საჩივარი შეიტანეს, 17 აგვისტოს, ყაზბეგის 24-ში მოჭრილ ხეებთან დაკავშირებით.

"ვითხოვთ დაისაჯოს ყველა ის პასუხისმგებელი პირი, ვინც გასცემს არასწორ ნებართვებს და ამას ეწირება არამხოლოდ გუშინ მოჭრილი ხეები, არამედ უამრავი საღი ხე თბილისში".

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.

პარტიზანული მებაღეობის წარმომადგენელმა, ნატა ფერაძემ თბილისის მერიასთან უვადო შიმშილობა დაიწყო. იგი მოითხოვს ეკოლოგიისა და გამწვანების სამსახურის თანამშრომლების გათავისუფლებასა და კვალიფიციური კადრების აყვანას, ასევე ქალაქში მიმდინარე ეკოპროცესების მკაცრ იურიდიულ გამოძიებას.