საქართველოს პრეზიდენტი, გიორგი მარგველაშვილი ამბობს, რომ არ შეიძლება საქართველოში დაიწყოს ნარკოტიკული საშუალებების წარმოება. ასე გამოეხმაურა პრეზიდენტი შინაგან საქმეთა სამინისტროს კანონპროექტს მარიხუანის კულტივაციის შესახებ მედიკამენტებისა და კოსმეტიკური საშუალებების დამზადების მიზნით.

მარგველაშვილმა ორ არგუმენტზე ისაუბრა. მისი თქმით, ეფექტურად ვერ გაკონტროლდება ნარკოტიკული საშუალებების გავრცელება და ბევრი ადამიანი გახდება მომხმარებელი.

"საგარეო პოლიტიკური თვალსაზრისით, საქართველო, როგორც ნარკოტიკების მწარმოებელი ქვეყანა არ არის ის იმიჯი, რისთვისაც ჩვენ ვუყვარვართ, გვაფასებენ, მხარს გვიჭერენ და გვიცავენ. ეს არის ძალიან რთული იმიჯი, რომელსაც შეიძლება მოჰყვეს რთული შედეგები. საქართველო ვერ იქნება ვერც მარიხუანის, ვერც სხვა ნარკოტიკული ნივთიერების მწარმოებელი ქვეყანა, ეს იარლიყი არ შეიძლება მიეწეროს ჩვენს სამშობლოს", — თქვა მეორე არგუმენტად პრეზიდენტმა.

რამდენიმე თვის წინ მთავრობამ მარიხუანის კულტივირების ლიცენზირების გასაცემად კანონპროექტი შეიმუშავა. მისი განხილვა ამ დროისთვის შეჩერებულია.

გაიგეთ მეტი მარიხუანის კულტივირების კანონის შესახებ