"ეს ის შემთხვევაა, რაც ყველა სახელმწიფოს ავალდებულებს, ისე გამოიძიონ საქმე, რომ არანაირი კითხვის ნიშნები არ დარჩეს", — ასე გამოეხმაურა სახალხო დამცველი ნინო ლომჯარია რუსთავი 2-ს მიერ გავრცელებულ ფარულ ჩანაწერს, სადაც სავარაუდოდ, მირზა სუბელიანი ხელისუფლებასთან გარიგებასა და კონკრეტული "საქმეების მოგვარებაზე" საუბრობს.

ლომჯარია ამბობს, რომ ამ საქმეში ყველაზე მნიშვნელოვანია ხორავას ქუჩაზე მომხდარი მკვლელობის გამოძიება და ისიც, სადაც სუბელიანი, სავარაუდოდ, წამებაზე საუბრობს.

"ამ ჩანაწერებიდან რაც ჩანს, ალბათ, არის ის, რომ პროკურატურაში ნამდვილად არის გარკვეული არაფორმალური გავლენები და ასევე, ახსენებს გარკვეულ დაინტერესებებს და ჩართულობას კონკრეტული პირების, კონკრეტული საქმეების საგამოძიებო მოქმედებების გარშემო", — განაცხადა ომბუდსმენმა.

გავრცელებული აუდიოჩანაწერის მიხედვით, სავარაუდოდ, დანაშაულის შეუტყობინებლობისთვის დაკავებული, მირზა სუბელიანის საუბარია ასახული. ის ყვება, რომ ჩაწერილი და დაარქივებული აქვს უზარმაზარი რაოდენობის მტკიცებულებები, რომლებიც ქართული ოცნების გუნდის უკანონო საქმიანობაზე მიუთითებს. მისი თქმით, საუბარია ადამიანთა გატაცებასა და წამებაზე. სავარაუდოდ, მირზა სუბელიანი გახმაურებულ საქმეებთან ერთად ხელისუფლების მაღალჩინოსნებზეც საუბრობს, რომელთა შესახებაც, მისივე თქმით, კომპრომატებს ფლობს.

ამ ჩანაწერში, სუბელიანი ამბობს, რომ გახმაურებული საქმეების გახსნაში საგამოძიებო უწყებებს ეხმარებოდა. დახმარება კი ჩვენებების მოწმეების, ძალადობით, კონკრეტულად კი ცემით მოპოვება იყო. აუდიოჩანაწერში, რომლის ავთენტურობა ჯერ დადგენილი არ არის, სავარაუდოდ, სუბელიანის ქართული ოცნების დეპუტატ ვიქტორ ჯაფარიძესთან და ლტოლვილთა სამინისტროს ყოფილ მაღალჩინოსანთან, გენერალური ინსპექციის ყოფილ თანამშრომელთან, დათო ცუხიშვილთან საუბარია ასახული.

გაიგეთ მეტი: