"ყვითელი ბარათი მოგვცა შინაგან საქმეთა სამინისტრომ და ვფიქრობ, ახლა სწორედ ის დროა, როდესაც გირჩის მხარდამჭერებმა უნდა გაგვამხნევონ. გირჩი არ უნდა დარჩეს მარტო", — On.ge-სთან საუბარში ასე უპასუხა გირჩის ერთ-ერთმა წევრმა, იაგო ხვიჩიამ შსს-ში გამართულ ბრიფინგს, სადაც უწყებამ ისინი გააფრთხილა.

შსს-ს განცხადებით, თუკი დაანონსებულ მარიხუანის ლეგალიზების ფესტივალზე ადგილი ექნება კანაფის გასაღებას ან ფლობას, მოხმარებას თუ პოპულარიზაციას, პოლიცია მკაცრ ზომებს გაატარებს.

იაგო ხვიჩიას თქმით, მხოლოდ გირჩის რამდენიმე წევრის გადასაწყვეტი არ უნდა იყოს, ჩატარდება თუ არა ფესტივალი:

"მე ყველაფერზე თანახმა ვარ, თუ დავინახავ, რომ ეს ადამიანებს სჭირდებათ".

იაგო ხვიჩიას თქმით, პარტია მოგვიანებით ვრცელ პასუხს გაავრცელებს შსს-ს გამოხმარებასთან დაკავშირებით.

შინაგან საქმეთა სამინისტრო, პარტია გირჩის მიერ დაანონსებულ მარიხუანის ლეგალიზების ფესტივალს დღეს, 13 ოქტომბერს გამოეხმაურა. შსს აცხადებს, რომ გირჩის მიერ დაანონსებულ ფესტივალს ისინი აფასებენ, როგორც დანაშაულის განზრახვის ორგანიზებას, სამართალდარღვევების ჩადენისაკენ მოწოდებასა და მოქალაქეთა წახალისებას, ჩაებან კანონსაწინააღმდეგო ქმედებებში.

პოლიტიკური გაერთიანება გირჩი 20 ოქტომბერს მარიხუანის ლეგალიზების აღსანიშნავი ფესტივალის გამართვას გეგმას. იაგო ხვიჩიას თქმით, ფესტივალის ზუსტ ფორმატზე ჯერ შეთანხმებულები არ არიან, თუმცა მისივე განმარტებით, დედა-ენის ბაღში მოსული ხალხი, მათ შორის ტურისტებიც მარიხუანის ყიდვასა და მოხმარებას თავისუფლად შეძლებენ.