საქართველოს ჟურნალისტური ეთიკის ქარტია შინაგან საქმეთა სამინისტროსგან და მთავარი პროკურატურისგან რუსთავი 2-ის ჟურნალისტებზე თავდასხმის სწრაფ და ეფექტურ გამოძიებას ითხოვს..

ორგანიზაცია საგამოძიებო ორგანოებსა და ხელისუფლებას, ასევე, მოუწოდებს, დანაშაულის სწრაფი და ეფექტიანი გამოძიებით გაემიჯნოს მედიაზე ძალადობას და უზრუნველყოს საქართველოში ჟურნალისტების უსაფრთხოდ მუშაობა.

ტელეკომპანია რუსთავი 2-ის ინფორმაციით, კურიერის ჟურნალისტს, ეკა გაგუასა და ოპერატორს, ლევან კალანდიას გადაღების დროს სცემეს. მათი ინფორმაციით, გადამღებ ჯგუფს ფიზიკურად ჩინეთის რკინიგზის 23-ე ბიუროს საქართველოს ოფისის წარმომადგენლები გაუსწორდნენ.

როგორც რუსთავი 2-ის საინფორმაციო სამსახურის უფროსმა, ნოდარ მელაძემ On.ge-სთან საუბრისას განაცხადა, ეკა გაგუა შაბათის კურიერისთვის გამოძიებაზე მუშაობდა, რომელიც ეხებოდა რკინიგზის მშენებლობის საკითხს. მისივე თქმით, ჟურნალისტს თავს მაშინ დაესხნენ, როცა ერთ კონკრეტულ დეტალს იღებდნენ.

"მათ თავს დაესხნენ, კომპანიის წარმომადგენლები, წაართვეს კამერა და სცადეს ვიდეომასალის წაშლა, უბრალოდ ვერ მოახერხეს იმიტომ, რომ ჟურნალისტმა შეძლო ჩიპის ამოღება, მიაყენეს დაზიანებები. ჩვენი კამერა ჩაკეტეს და არ გვიბრუნებდნენ, ვიდრე ადგილზე პოლიცია არ მივიდა", — განაცხადა მელაძემ.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 154-ე მუხლით დაიწყო, რაც ჟურნალისტისთვის პროფესიულ საქმიანობაში უკანონოდ ხელის შეშლას გულისხმობს.