საქართველოს საპატრიარქო აცხადებს, რომ რუსული და უკრაინული მედია უკრაინული ეკლესიის ავტოკეფალიის პოზიციაზე დეზინფორმაციას უვრცელებს. მათი თქმით, "ორივე მხარე" ქართული ეკლესიის პოზიციას სათავისოდ იყენებს.

საპატრიარქო იმეორებს, რომ ავტოკეფალიის საკითხზე გადაწყვეტილება არ მიუღია და იქამდე არ მიიღებს, სანამ საეკლესიო კანონიკის ნორმებზე დამყარებულ საბოლოო ოფიციალურ გადაწყვეტილებას არ დააფიქსირებს როგორც კონსტანტინეპოლის, ისე მოსკოვის საპატრიარქო.

უკრაინის ეკლესიის ავტოკეფალია და საქართველო

კიევის საპატრიარქომ მსოფლიო პატრიარქს რუსეთის საპატრიარქოსგან გამოყოფა ამ წლის აპრილში სთხოვა. მსოფლიო პატრიარქმა ბართლომემ განაცხადა, რომ უკრაინა ავტოკეფალიას მალე მიიღებს, რადგან ეს მისი უფლებაა.

სინოდის სხდომის დროს რუსეთის საპატრიარქომ გადაწყვიტა, რომ უკრაინის საკითხის გამო მსოფლიო პატრიარქს ბართლომე პირველს ლოცვებში აღარ მოიხსენიებდა. ასევე, მის წარმომადგენლებთან ყველანაირ ურთიერთობას წყვეტდა.

კიევის პატრიარქმა ფილარეტმა განაცხადა, რომ ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

გარდა ამისა, საპატრიარქომ მოუწოდა მღვდელმთავრებს თავი შეიკავონ მსოფლიო პატრიარქისა და რუსეთის პატრიარქის კრიტიკისგან და განაცხადა, რომ ეს მიუღებელია.

ილია მეორე უკრაინის უმაღლესი რადას წევრსაც შეხდა უკრაინის ეკლესიის საკითხზე სასაუბროდ, თუმცა პოზიცია კვლავ არ შეუცვლია.